கனவில் தொலைதல்..

கவனத்தில் படிதல்

2011-12-20T15:32:00.001+05:30

கொஞ்சம் கொஞ்சமாய் நீ
கவனம் பெறத் துவங்குகிறாய்
உன் குரலும் மொழியும்
மெல்ல மெல்ல பிடிக்கத்துவங்கி
பித்தமாய் மாறும் பாடலை ஒத்திருக்கிறது
நீ மொழியொன்றை வைத்திருக்கிறாய்
உனக்கே உனக்கேயான மொழியொன்று
நீ பெரும்பாலான சமயங்களில்
அம்மொழியில் மட்டுமே பேசுகிறாய்
அம்மொழி கிளைகளில் தொங்கும்
தூக்கணாங்குருவிகளின் கூடுகளைப் போல்
தோற்றமளிக்கிறது எனக்கு
வீசும் காற்றில்
ஆடும் கூடுகளின் திசைகளைக் கொண்டு
உன் மொழியை புரிந்துகொள்ள முயல்வதுண்டு
நீ அவ்வபோது உன் மொழியில்
கள்ளக்குறும்புகளை முத்தங்களை
பேசுவதாய் தோன்றுமெனக்கு
கொஞ்சம் கொஞ்சமாய்
உன் மீது பித்தேறத் துவங்குகிறது
நீ என் பித்தமாகத் துவங்குகிறாய்

#மூக்கனாங்கவுறு போல ஊன்னெனப்பு சீம்பாலு வாசம் போல உஞ்சிரிப்பு

very long time before

துயரத்தின் பாடல் (அ) உன்னை பொதிந்து வைத்திருக்கும் பாடல்களில் ஒன்று

2011-04-06T16:21:00.001+05:30

மிகவும் பிடித்த அப்பாடலை
வெகுநாட்களுக்கு பிறகு
திரும்பத் திரும்ப கேட்டுக்கொண்டிருக்கிறேன்
அப்பாடல் ஒரு கடற்பறவையாய் மாறி
நினைவுக்கடலின் உள்ளேயும் வெளியேயுமாய்
பறந்து பறந்து
சில மீன் நினைவுகளை வேட்டையாடிக்கொண்டேயிருக்கிறது
உண்டு கொழுத்து
ஒரு கடற்பூதமாய் அப்பாடல் மாறுகிற கணத்தில்
துயரத்தின் மழை வலுக்கத்துவங்கும்
அம்மழையில் கரைந்து
நானெது என்றறியாத முடியாத வேளையில்
நீ சட்டென உயிர்பெற்று
முகத்திலறைந்துவிட்டுப் போவாய்
சற்றும் எதிர்பாராது அறைவாங்கிய
சிறுகுழந்தையென நிலைதடுமாறி
உன் பின்னால் ஓடிவருவேன்

image courtesy : fineartamerica.com

06.04.2011

பெருவனத் தாலாட்டு (அ) வனநீலியின் பாடலில் துயில் கொள்ளும் காடு

2011-02-24T14:43:00.005+05:30

பெருவனத்தை மெல்ல ஆக்ரமிக்கும்
கரும் இரவின்
இழைகளுலொன்று
நூற்றாண்டுகால மரமொன்றின்
கிளையில் வந்து அமர
தாய்ப்பறவைக்காக காத்திருக்கிற சிறுகுஞ்சுகள்
மிரட்சியடைந்து
பின் தாளா ஆர்வத்தில்
தம் சிறு அலகுகளால்
இரவின் இழையை பற்றியிழுக்கத்துவங்க
வேடிக்கைப்பார்த்துக்கொண்டிருந்த
வனநீலி
அச்சிறுபறவைகளுக்காக
பாடலொன்றை பாடத்துவங்குகிறாள்
மொத்தவனமும்
அப்பாடலின் கதகதப்பில்
துயிலத் துவங்குகிறது

# காடு வாசிக்க ஆரம்பித்திருக்கிறேன். நான் வாசிக்கும் முதல் ஜெமோ படைப்பு..
24.02.2011

நினைவின் வெளியெங்கும் இறைந்து கிடக்கும் உன் பாதச்சுவடுகள்..

2011-01-10T22:25:00.004+05:30

நினைவின் வெளியெங்கும் இறைந்து கிடக்கும் உன் பாதச்சுவடுகள்..

நினைவின் வெளியெங்கும்
இறைந்து கிடக்கும் உன் பாதச்சுவடுகளை
எப்படி சேகரிப்பது அல்லது அப்புறப்படுத்துவது
என்பதான யோசனைகளில்
கழிகிறது இந்நாட்கள்
அல்லது
மொத்த நினைவு வெளியையும்
அழித்துவிட்டு புதியாய் ஒரு நினைவு வெளியை
உருவாக்குவது
அல்லது
உன் நினைவுச் சுவடுகளை
வேறு சில நினைவுகளை கொண்டு
மறைப்பது அல்லது அழிப்பது
அல்லது
உன்னை கொலை செய்துவிட்டு
தற்கொலை செய்து கொள்வது

- Eternal Sunshine of the Spotless Mind திரைப்படத்தின் பாதிப்பில் எழுதியது..

●●●●●●●●●●●●●●●●●●●●●●●●●

எது உன்னை மீளச்செய்யும் ?

எது
உன்னை மீளச்செய்யுமென்று
யோசித்துக்கொண்டிருந்த
பின்னிரவு வேளையொன்றில்
ஏற்கனவே கொன்றுவிட்டிருந்த
உன் தரப்பு நியாயங்களை
ஒவ்வொன்றாய் எடுத்து
உயிர்ப்பிக்கத் துவங்கினேன்
என் தரப்புகள் இயல்பாக மரிக்கத்துவங்க
அதீத குற்றவுணர்வில் விழுந்து
தற்கொலை பற்றி சிந்திக்க ஆரம்பித்தக் கணத்தில்
உன் ஆறுதலான முத்தங்களுக்கு
மனது ஏங்கிச்சாகத் துவங்கியது
ஆனால் உன் பெருங்கருணை கண்களை
இனி காணவே கூடாதென்று
முடிவெடுத்த பொழுதில்தான்
எனது தற்கொலை நிகழத் துவங்கியது
வெகு இயல்பாக

●●●●●●●●●●●●●●●●●●●●●●●●●

நானொரு பிசாசு

நீயற்ற பொழுதுகளெல்லாம்
பிசாசுகளாய்
உருமாறிக் கொண்டிருந்தவேளையில்
உன்மத்தம் பீடித்துபோய்
குடித்துக்கொண்டிருந்தேன்
உன் மடியில் வீழ்ந்து அழுதுதீர்க்கவேண்டும்
போலிருந்தது
என்னை மன்னித்துவிடு
பற்களை கூர்தீட்டும்
உன் பிசாசுகளை திருப்பிஎடுத்துக்கொள்
நானொரு கோழை
நானொரு கேவலமானவன்
நானொரு பிசாசு

வெகுநாட்களுக்கு முன் கிறுக்கி draft-ல் போட்டு வைத்திருந்தது.. தளத்தின் வெறுமையை போக்க இதை பதிகிறேன்..

நிறங்களின் தோற்றம் மற்றும் மறைவு (அ) உருமாற்றம்

2010-09-16T02:03:00.004+05:30

பெருவானத்தின்
அனைத்துத் திசைகளையும்
விழுங்கிச் செரித்த
கருநீலப்பறவையொன்று
மலைப்பாறையொன்றின் மீது மோதி
உயிரை மாய்த்துக்கொண்டது

செஞ்சூரிய நிறத்து மலை
வான் நீல நிறத்துக்கு
மாறத்துவங்கியது
மெல்ல மெல்ல

21.08.2010

ரொம்பநாளுக்கு பிறகு எழுதி, சமீபத்தில் பஸ்ஸில் போட்டது.. ரொம்ப நாளா இந்த தளம் வெறுமனே கிடப்பதால், இங்கும் பதிகிறேன்..

சுழற்சி - மறு சுழற்சி :: எதிர் சுழற்சி - சுழற்சி

2010-05-14T15:21:00.006+05:30

திசைகளைச்
சுழற்றி உட்கொள்ளும்
சூறாவளி

சூறாவளிக்குள்
சுழன்றுகொண்டிருக்கும்
திசைகளின் மீது ஒட்டிக்கொண்டிருக்கும்
வாழ்க்கை

நீயற்ற பொழுதுகளை
நத்தையென சுமந்து ஊர்கிறேன்
சுடும் பாலையாய் நீண்டு வளர்கிறது
வாழ்க்கையின்
திசை

12.05.2010

தற்கொலை செய்துகொள்ளக்கூட பயப்படுகிறவனின் வீடு (அ) எல்லாம் பயமயம்..

2010-05-05T17:34:00.005+05:30

எனக்கிருக்கும் பயங்கள் ஒவ்வொன்றாய்
எலிகளாய் மாறத் துவங்கியதன்
இருபத்திமூன்றாம் நாளில்
எலிகளால் நிறைந்திருந்தது
வீடு

நிற்கவோ
நடக்கவோ
அமரவோ
படுக்கவோ
முயற்சிக்கும் போதெல்லாம்
ரத்தம் வருமளவு கடித்துவிடும் எலிகளால்
அழுகிய ரத்தவாடையில் மிதந்தது
வீடு

எலி குழுக்கள்
ஒன்றையொன்று கேலிசெய்தபடியும்
ஒன்றோடொன்று சண்டையிட்டபடியும்
என்னை தின்றபடியும்
பொழுதுகளின் மீது உலத்திக்கொண்டிருந்ததை
கலவரத்தோடுப் பார்த்துக்கொண்டிருந்தது
வீடு

முப்பத்தியிரண்டாம் நாளில்
சரியாக ஐந்து மணி அளவில்
தற்கொலை செய்துகொள்ளும் தைரியம் வந்தவனாக
முன்பு வாங்கி வைத்திருந்தக்
கயிறைத் தேடுகையில்
சில எலிகள்
கயிற்றுத்துண்டுகளாக உருமாறிக்கிடந்தன
வீடெங்கும்

03.05.2010

பிசாசுக் கொண்டு தாக்குகிறவள் (அ) பிசாசைக் காதலிக்கிறவள்..

2010-04-16T18:21:00.002+05:30

என் மீதான
உன் புறக்கணிப்புகளிருந்து
உயிர்கொள்கிற பிசாசொன்று
என் மீதான வன்முறையை ஆவேசமாய்
துவங்கும்
தூக்கங்களை பறித்துக்கொண்ட
பின்னிரவு பொழுதுகளில் மிகுந்த வன்மம் கொண்டு
உன் வாசம்
உன் அருகாமைகள்
உன் நினைவுகள்
உன் முத்தங்கள்
உன் சொற்கள்
உனக்கு பிடித்த பாடல்கள்
என வெவ்வேறு கொடுங்கத்திகளால்
மூர்க்கமாய்
என்னைக் கிழித்துப்போடும்

அடுத்தமுறை உன்னை காண்கையில்
மிகுந்த வன்மத்தோடு முத்தமொன்றை
அழுந்தக்கொடுப்பேன்
என்னை பிசாசென்று திட்டத்துவங்குவாய்
நீ

16.04.2010

போலிப்புன்னகைகளின் பொருண்மை (அ) உடலுக்குள் பெருத்து வளரும் மீன்கள்..

2010-03-29T18:49:00.006+05:30

எதிர்பாரா கணத்தில்
எனை பார்த்துவிட்டதற்காய்
நீ வலிந்துதிர்த்த குறும்புன்னகையொன்று
நீரின் பற்றுதலை இழந்துவிட்ட
சிறுமீனின் அவஸ்தைகளாய்
தரையில் துடித்துக் கொண்டிருந்தது
அச்சிறுமீனை
கைகளில் பத்திரமாய் எடுத்து
என் உமிழ்நீரினுள் நீந்திக்கொள்ளவிட்டேன்
அங்கிருந்துத் துள்ளி
உள்ளே விழுந்த அச்சிறுமீன்,
ஒரு பெரும் திமிங்கலம் விழுங்கிய உடலாய்
நெஞ்சை அடைத்துக்கிடந்தது
கனம் தாளாமல்
தலைக்குப்புற விழத்துவங்கினேன் நான்

28.03.2010

தேவையற்ற ஒரு குறிப்பு : Revolver படத்தில் அந்த note-ஐ படித்ததும், படிக்கட்டுகளில் Jason Statham தலைக்குப்புற விழத்துவங்கும் காட்சி நினைவுக்கு வருகிறது.

காதல் என்கிற ஆதிசாபம் (அ) வெவ்வேறு நிற உருவங்களால் தொடர்ச்சியாய் துன்புறுத்துகிறவள்..

2010-02-13T04:12:00.005+05:30

நீ விலகி சென்ற பின்பான நாட்களில்
வலிகளால் மட்டுமேயான உலகமொன்று
என்னை விழுங்கிக்கொண்டது
மரண ஓலங்களும் இரத்தத்தின் பிசுபிசுப்புகளும்
தலைக்குள் ஓயாது தொடர
ஓடிக்கொண்டேயிருந்தேன்
உன் உருவங்கள்
சிரித்தபடி கொஞ்சியபடி முறைத்தபடி அழுதபடி
எப்போதுமாய் எதிர்ப்பட்டுக் கொண்டேயிருந்தன
உன் உருவங்கள் கடந்த ஒவ்வொருமுறையும்
நான் உடலெங்கும் கூர்நகங்களால்
கீறிக்கொண்டேன்
தனிமைகள் தகிக்கும் வெப்பங்களை உமிழ்ந்தன
நான் மாறி மாறி
தற்கொலை செய்துகொண்டேயிருந்தேன்
உன் நினைவுகள் விலகுவதாயில்லை
நான் உன் உருவங்களைக் கொலைசெய்ய துணிந்தேன்
உன் வெவ்வேறு நிற உருவங்களுக்கு மத்தியில் நீ
சிரித்துக்கொண்டேயிருந்தாய்..

13.02.2010

டீ பற்றிய இரண்டுக்கவிதைகள் (அ) உருமாறும் தோற்றங்கள் நிகழ்த்தும் தொடர் பிறழ்வுகள்..

2010-02-09T21:18:00.001+05:30

காலையில் டீ குடிக்க செல்கையில்தான்
அக்கவிதையை கண்டேன்
டீக்கடையில் டீ குடித்துக் கொண்டிருந்தது
என்னைக் கண்டதும் தாவிக்குதித்து
பள்ளிச்சிறுமியொருத்தியின்
புத்தகப்பையாக மாறிக்கொண்டது
என் பார்வைகள் அக்கவிதையைத் தொடர
அங்கிருந்து
செய்தித்தாள் ஒன்றின் முதல்பக்கசெய்தியாக
மெதுவாக நடந்துபோகும் மாடாக
இளைஞி கழுத்தில் தொங்கும் அடையாள அட்டையாக
குழந்தையொன்றின் மூக்கின் ஒழுகலாக
பிச்சைக்காரர் ஒருவரின் தட்டில் சில்லரையாக
சண்டையிட்டுக் கொண்டிருந்த இரண்டாவது நாயாக
பூக்காரப்பெண்ணின் கைகளில் ப்ளேடாக
மாறி மாறி உருமாறி தாவிக்கொண்டிருந்த
அக்கவிதை
சடுதியில் என்னருகில் நானாக வந்து நின்றது
எந்த நான் மெய்யான நான் என்பதில்
மேலும் குழப்பமடைந்து
டீக்கடைக்காரரிடம் இரண்டு டீயாக சொன்னேன்
அவர் டீ பற்றிய இரண்டுக்கவிதைகளை சொல்லிவிட்டு
நட்பாக புன்னைகைத்தார்

09.02.2010

கொடும்பசிக் கனவுகளின் மறந்துபோன முகங்கள்..

2010-01-26T12:00:00.001+05:30

எண்ணிலடங்காக் கனவுகள்
ஒவ்வொரு நாள் இரவையும் கைப்பற்றிவிடும்
இருள்கருப்பு ரத்தச்சிவப்பு வான்நீலம்
காட்டுப்பச்சை எனக் கனவுகளின்
அனைத்துப் பற்களும்
பயத்தின் பிரத்யேக வண்ணங்களால் தீட்டப்பட்டிருக்கும்
மேலும் பற்பல வண்ணங்கள்
பிணைந்தக் கனவுகள்
உடல் முழுதும் சுற்றித்திரியத்துவங்கும்
உடலின் ஒவ்வொரு பாகத்தையும்
ஒரு கனவோ அல்லது
கனவுக்குழுக்களோ உட்கொள்ளத்துவங்கிடும்
ஒருவாறாக விடிகிற காலையில்
எஞ்சிய உடலின் சிதைவுகளைக் காண்கையில்
மிகுந்த பயமாயும்
அருவருப்பாகவும் இருக்கும்
அக்கொடும்பசிக்கனவுகளை நினைவுபடுத்தி
என்னுடைலைக் கைப்பற்றத் தோன்றினாலும்
வழமைபோல் எக்கனவும்
முழுமையாக நினைவுக்கு வருவதேயில்லை

21.01.2010

வன்மங்களின் வரைபடத்தில் கொலைகளின் தடயங்கள்..

2010-01-19T16:56:00.003+05:30

சமீபத்திய கனவுகளின் ஆழ்பிரதேசங்களில் இருள் பொதிந்த பொருளொன்றின் இருப்பு தென்பட்டுக்கொண்டேயிருந்தது. நேற்றைய கனவில் முயன்று அப்பொருளை கண்டெடுத்தபோது மிகுந்த அதிர்ச்சியாயிருந்தது. அது மூளையின் திசுக்களில் வன்மங்களின் நிறங்களை கொண்டு வரையப்பட்ட வரைபடமது. அவ்வரைப்படத்தின் துவங்கும் பாதையிலிருந்து முடியும் பாதை வரையிலான இருபத்தியாறு கொலைப்புள்ளிகளும் ஒரு தற்கொலை புள்ளியும் உள்ளடக்கியதாயிருந்தது. அந்த இருபத்தியாறு கொலைப்புள்ளிகளில் எனக்கு பரிட்சயமானமானவர்களின் பெயர்களும் பரிட்சயமில்லாதவர்களின் பெயர்களும் அந்த இருபத்திஏழாவது தற்கொலைப்புள்ளியில் எனது பெயரும் குறிக்கப்பட்டிருந்தது.

எனக்கு கொலை செய்வதிலும் தற்கொலை செய்துகொள்வதிலும் சமீபகாலமாக விருப்பமில்லாத காரணத்தினால், மிகுந்த பயத்தை உயிரில் கலக்கதுவங்கியது அவ்வரைபடம். மேலும் என்னைப்பற்றி உளவறிந்த அல்லது நன்குதெரிந்த நபர்களின் விளையாட்டாக அல்லது அவர்களின் திட்டத்தை செயல்படுத்தும் கருவியாக என்னை பயன்படுத்த, இப்படியான ஒரு வரைபடத்தை தயாரித்து, என் கனவுகளையும் உளவறிந்து, அவை பயணிக்கும் பாதையையும் நன்கறிந்த பின், என் கனவுகளில் ஊடுருவி வந்து வைத்துவிட்டு போயிருக்கலாம் என்ற சந்தேகம் மனதில் நிழலாடியது.

வரைபடத்தை பத்திரப்படுத்திய நான், இதன் பொருட்டே என் கனவுகளின் திசையையும், எனது பெயர், முகவரி மற்றும் முகத்தையும் மாற்றிக்கொள்ள வேண்டியிருந்தது. இந்த நகரின் அனைத்து முகங்களும் எனக்கு பரிட்சயமென்பதால், ஒவ்வொரு நாளும் ஒவ்வொருவரின் முகத்தோடு நான் வீதிகளில் அலைய துவங்கினேன். வீதிகளில் செல்வோர் சிலர் தன் முகத்தை என்னில் பார்த்தபோது மிரண்டு, பின்பு அது தன் முகமல்ல, தன் முகமொத்த வேறொரு மனிதன் என்ற சமாதானத்தோடு சென்றனர்.

சரியாக பதினைந்து நாள் தலைமறைவு வாழ்க்கைக்கு பின், எனக்கு அந்த வரைபடத்தை எடுத்துப்பார்க்கும் விபரீத ஆசை வந்தது. கடந்த பதினைந்து நாட்களில் நான் எந்த கொலையையும் செய்யவில்லை என்பதும், என் கனவுகளை எவரும் ஊடுருவியது போன்றதொரு தடயமும் இல்லாத போதுமான காரணங்கள் தந்த பாதுகாப்பு வெம்மை, என்னை மீண்டும் அவ்வரைபடத்தை பார்க்க தூண்டியது. வரைபடத்தின் முதல் கொலைப்புள்ளியில் எழுதியிருந்த அவன் பெயரை படித்தேன். இந்நகரத்துக்காரன்தான். எனக்கு தெரியும் அவனை. அடுத்த இரண்டுநாட்கள் அவனை பின்தொடர்ந்து அவன் வாடிக்கைகளை பழகிக்கொண்ட பின், அவனை கொலைசெய்யும் எண்ணம் பிறந்தது, எனக்கே மிகுந்த வேடிக்கையாகவும் விபரீதமாகவும் இருந்தது.

அடுத்த மறுநாள் இரவில், அவன் குகை வாயிலில் இருள் மறைவில் அவனுக்காக காத்துக்கொண்டிருந்தேன். விஷம் படிந்த கத்தியோடு காத்திருக்கையில், வந்து சேர்ந்தான் என் முதல் கொலைப்புள்ளி. அவன் வாயிலை நெருங்கும் நேரம், பின்புறமாக இருந்து கத்தியை வீச எத்தனித்த நொடி, அவன் திரும்பி, என் நெஞ்சில் ஆழமாய் வீசினான் அவனிடமிருந்த கத்தியை.

ரத்தம் பீறிட, தரையில் வீழ்கையில், அவன் கைகளிலிருந்து அதை பிடுங்கியபடி விழுந்தேன். அது ஒரு வரைபடம். இப்போது எல்லாம் விளங்கிற்று. அவ்வரைபடத்தின் முதல் புள்ளி, என் கொலைப்புள்ளி; பின்பான கடைசிப்புள்ளி அவனின் தற்கொலைப்புள்ளி. அந்த வரைபடம் அவனுக்கானது. உருமாறும் உத்திகள் கைவரப்பெற்ற என்னை அவனால் கண்டுபிடித்து கொலை செய்ய முடியாமல் போகக்கூடும் என்பதனால், நானாய் வந்து அவன் கையில் சிக்குவதற்காக, அவனுக்கான வரைபடத்தின் தலைக்கீழ் பிரதி என் கனவுகளில் புதைக்கப்பட்டிருந்திருக்கிறது..

- சொல் என்றொரு சொல் புத்தகத்தின் இருள் நகரத்தில் வசிக்கும் ஆத்மார்த்தி, அரூபதர்ஷினி, பிரபஞ்சனா, விமோசனா, பிரேம் - ரமேஷ், நன்மொழித்தேவன், அடர்கானகப்புலி மற்றும் அதீதன் நினைவாக எழுதியது..

16.12.2009

விரிசல்கள் விலகுகின்ற புள்ளியொன்றில்

2010-01-12T13:06:00.005+05:30

உன்னை எங்கனம்
புரிந்துகொள்வது என்பதும்
உன்னை புரிந்துகொள்ளுதல்
தேவையா என்பதும்
புரிதல் இரு மனிதர்களை
பிணைக்கக்கூடியதா என்பதும்
என்பதும் என்பதுமான
எப்போதுக்குமான கேள்விகளுக்குள் தொலைந்துவிடுகிறேன்
நீயும் நானும் சேர்ந்து
தற்கொலை செய்து கொண்டாலோ அல்லது
நீ என்னையும் நான் உன்னையும்
கொலை செய்து கொண்டாலோ அல்லது
நீயும் நானும் பைத்தியமானாலோ
அல்லது கலவியோ
நம்மை பிணைக்கும் சாத்தியமுள்ளதாக இருக்கிறது
விரிசல்கள் விலகுகின்ற புள்ளியொன்றில்
எதைக் கொண்டாவது*
என்னை அழி
துரத்தியடி
நிராகரி
காறியுமிழ்
சொற்களின் வன்மம் கொண்டு
கருக்கு
மிதி
புதை
மீண்டும் எழாமலென்னை
அழித்தொழி
.................
வெறுமனே விலகாதே
.......................
உன் விலகல்
என் பைத்தியம்

@அய்யனார் : தல, உங்க அனுமதி இல்லாம *உங்க கவிதையை சேர்த்து விட்டிருக்கிறேன். Sorry..

12.01.2010

வாசித்தப் புத்தகங்களும் வாங்கியப் புத்தகங்களும்..

2010-01-06T19:21:00.007+05:30

எனக்கு வாசிக்கும் பழக்கமே புதிது. வாழ்வில் இரண்டாம் முறையாக, கடந்த புத்தாண்டு தினத்தன்று புத்தகக்கண்காட்சிக்கு சென்று வந்தேன். அய்யனார் மற்றும் லேகாவின் புத்தக அறிமுக பதிவுகளைக் கொண்டு கொஞ்சம் புத்தகங்கள் வாங்கி வந்தேன்.

பதிவர்களில் பலர், சுஜாதாவின் வாசகர்களாக/ரசிகர்களாக இருப்பதினால், எனக்கும் சுஜாதாவின் புத்தகம் வாசிக்க ஆர்வம் மிகுந்திருந்தது. ஆனால் உயிர்மை புக் ஸ்டாலில் எந்த புத்தகம் வாங்குவது என்ற குழப்பத்தில் எதையும் வாங்காமல் வந்துவிட்டேன். சுஜாதாவை வாசித்திருப்பவர்கள் அவரின் புத்தகங்களை பரிந்துரை செய்யுங்கள். அடுத்தமுறையாவது வாங்கணும்.

மேலும் ரமேஷ் பிரேமின் எழுத்துக்களை வாசித்தப்பின் பித்து பிடித்த நிலைமையாகிவிட்டது. இந்த முறையும் அவரின் புத்தகங்களை தேடிப்பிடித்தேன். அப்படியும் எதிர்பார்த்த இரண்டு புத்தகங்கள் கிடைக்கவில்லை. மேலும் அவர்கள் பிரிந்து, இப்போது தனித்தனியாக எழுதுகிறார்கள் போலும். கடந்தவருடம் வாங்கியிருந்த ரமேஷ் பிரேமின் புத்தகங்கள் இதோ.
சொல் என்றொரு சொல், கனவில் பெய்த மழையை பற்றிய சில இசை குறிப்புகள், குருவிக்கார சீமாட்டி, கொலை மற்றும் தற்கொலை பற்றி, சக்கரவாளக்கோட்டம். அத்தனையையும் பரிந்துரைக்கிறேன், நீங்கள் வாங்கும் எண்ணத்தில் இருந்தால்.

சொல் என்றொரு சொல் புத்தகத்தை வாசிக்கும் எவரும் அதன் போதையை உணருவர். ஆனால் இந்த புத்தகத்தை வாங்கிய போது நிகழ்ந்த சம்பவம் இப்போது நினைவுக்கு வந்து தொலைக்கிறது. இதை பொதுவெளியில் சொல்லலாமா என்று தெரியவில்லை, இருந்தாலும் சொல்கிறேன், ஏனென்றால் தமிழ் எழுத்தாளர்களின் அவல நிலை இப்படித்தான் இருக்கிறது. பொதுவாக ரமேஷ் பிரேமின் புத்தகங்களை வெளியிட பல பதிப்பகத்தார் அஞ்சுவர் போல. நகுலன் புத்தகங்களையும், சொல் என்றொரு சொல் புத்தகத்தையும், நான் வாங்கியது காவ்யா பதிப்பகம் நடத்தும் பேராசிரியர் சண்முகசுந்தரத்தை அவர் வீட்டில் சந்தித்து. அவர் பேச்சுவாக்கில் சொல்லியது இதுதான். "இந்த புத்தகத்தை (சொல் என்றொரு சொல்) முதல் பதிப்பாக 1000 காப்பிகள் வெளியிட்டேன், இன்னும் பாதிக்கூட விற்கவில்லை." இந்த புத்தகத்தை வாசித்து முடித்தபோது, இப்படியொரு புத்தகம் தமிழ்சூழலில் விற்காமல் தங்குகிறதே என்பது வருத்தம் தந்தது.

கடந்த முறை வாங்கியதில் மிகவும் பிடித்த இன்னொரு புத்தகம் ஜே.பி.சாணக்யாவின் கனவுப்புத்தகம். மிக சிறப்பான சிறுகதைகள் தொகுப்பு. மிக மிக வலுவாக பரிந்துரைக்கிறேன் இப்புத்தகத்தையும்.

கடந்த முறை வாங்கிய சாருவின் புத்தகங்களில் எக்சிஸ்டென்ஷியலிஸமும் பேன்சி பனியனும், ஜீரோ டிகிரி, ராசலீலா, மதுமிதா சொன்ன பாம்புக்கதைகள் (சிறுகதைகள் தொகுப்பு) நான்கையும் வாங்கலாம்.

கோபி கிருஷ்ணனின் எல்லா புத்தகங்களையும் வாங்கலாம். நகுலனின் புத்தகங்கள் வாங்கியிருந்தேன். ஒன்றை கூட படிக்கமுடியவில்லை. என்னால் அவரின் எழுத்துக்களோடு பயணிக்க முடியவில்லை. இன்னும் கொஞ்சம் வாசிப்புக்குப்பின் தொடலாம் என்று வைத்திருக்கிறேன். :)

இந்த முறை வாங்கும் எண்ணத்தில் இருந்து கிடைக்காமல் போன / வாங்க மறந்த புத்தகங்கள்.
ரமேஷ் பிரேமின் இருபது கவிதைகளும் இரண்டாயிரம் ஆண்டுகளும், புதைக்கப்பட்ட மனிதர்களும், ஜே பி சாணக்யாவின் மற்ற புத்தகங்கள். பச்சையம், அனிதாவின் கவிதை தொகுப்பு, சுஜாதாவின் புத்தகம் ஒன்று அல்லது சில, இன்னும் சில.

இந்த முறை புத்தகக்கண்காட்சியில் சாருவையும், மனுஷ்யபுத்திரனையும், நாஞ்சில் நாடனையும் பார்க்க முடிந்தது. எனவே புத்தகத்தின் முதல் பக்கத்தில் அவர்களின் கையெழுத்தை வாங்கிக் கொண்டேன். சாருவின் கையெழுத்து ரொம்ப அழகாக இருந்தது. அய்யனார் வந்திருந்தால் அவரின் கையெழுத்தையும் வாங்கி இருக்கலாம்.

இந்த முறை வாங்கிய புத்தகங்கள்.

அடிப்படைத் தமிழ் இலக்கணம் (இலக்கணப் பிழையில்லாமல் தமிழில் எழுத கத்துக்கணும்)

ரமேஷ் பிரேமின் கருப்பு வெள்ளை கவிதை (அகரம்), மகாமுனி(அடையாளம்), உப்பு (உயிர்மை), அதீதனின் இதிகாசம் (மருதா)

பிரேம் மட்டும் எழுதிய அதிமனிதர்களும் எதிர்மனிதர்களும் (புலம்)

ரமேஷ் பிரேதன் மட்டும் எழுதிய சாரயக்கடை (உயிர்மை)
சாருவின் சினிமா - அலைந்து திரிபவனின் அழகியல் (உயிர்மை)
மனுஷ்யபுத்திரனின் அதீதத்தின் ருசி (உயிர்மை)
எஸ்.ராவின் யாமம் (உயிர்மை)
என் பெயர் ராமசேஷன் - ஆதவன் (உயிர்மை)
மனோஜின் புனைவின் நிழல் (உயிர்மை)
முகுந்த் நாகராஜனின் ஒரு இரவில் 21 சென்டிமீட்டர் மழை பெய்தது (உயிர்மை)

அய்யனாரின் மூன்று புத்தகங்கள் (உரையாடலினி, நானிலும் நுழையும் வெளிச்சம், தனிமையின் இசை) - வம்சி
பவா செல்லதுரையின் நட்சத்திரங்கள் ஒளிந்து கொள்ளும் கருவறை (வம்சி)
உப்புக்கடலை குடிக்கும் பூனை - க.சி.சிவக்குமார் (வம்சி)
கண் பூக்கும் தெரு - பாலு சத்யா (வம்சி)

கல்கியின் பொன்னியின் செல்வன் (செண்பகா பதிப்பகம்)

பிரமிள் படைப்புகள் (அடையாளம்) (இவரின் கவிதை தொகுப்பை வாங்காமல் விட்டுவிட்டேன்)

ஆதவன் தீட்சண்யா சிறுகதைகள் (சந்தியா)
கல்யாண்ஜியின் இன்னொரு கேலிசித்திரம் (சந்தியா)

ஜோ டி குருஸ்-ன் ஆழி சூழ் உலகு (தமிழினி)
பிரான்சிஸ் கிருபாவின் கன்னி (தமிழினி)
யுவன் சந்திர சேகரின் குள்ளசித்தன் சரித்திரம் (தமிழினி)

நாஞ்சில் நாடன் கதைகள் (united writers)
மகுடேஸ்வரனின் காமக்கடும்புனல் (united writers)

ஜி.நாகராஜனின் ஆக்கங்கள் (காலச்சுவடு)
சுந்தர ராமசாமியின் ஜே ஜே சில குறிப்புகள் (காலச்சுவடு)
சா.கந்தசாமியின் - சாயாவனம் (காலச்சுவடு)

எம்.ஜி.சுரேஷ் - பின்நவீனத்துவம் என்றால் என்ன? (அடையாளம்)
க.பூரணச்சந்திரன் - அமைப்பியமும் பின் அமைப்பியமும் (அடையாளம்)

ராஜீவ் கொலை வழக்கு - கே.ரகோத்தமன் (கிழக்கு)

இவ்ளோவையும் ஒரு வருஷத்தில படிச்சிடுவியா, சரவணா!!!

இந்த மருதா பதிப்பகம் புக் ஸ்டால் போடவே மாட்டாங்களா. கடந்த வருடமும் இல்லை, இந்த வருடமும் இல்லை..

06.12.2010

கதைப்பரப்புகளில் உலவித்திரியும் சொற்கள் (உரையாடல் கவிதைப் போட்டிக்காக)

2010-01-04T22:05:00.006+05:30

நான் எழுதியக் கதையொன்றில்
எல்லாமே மாறியிருந்தது தன்னிச்சையாக
சமவெளிகளெல்லாம்
பாலைகளாய் மாறியிருந்தன
காடுகளின் பல்வேறு விலங்கினங்கள்
வேட்டையாடப்பட்டிருந்தன
கதையின் முகப்புக்கதவுகள் அடைக்கப்பட்டு
உடைக்கப்பட்ட பின்வாசல்கள்
வழியாக கதைமாந்தர்கள்
கூட்டம்கூட்டமாகக் கதையிலிருந்து
வெளியேறிக்கொண்டிருந்தனர்
ஆங்காங்கே போர்களும் நடந்துகொண்டிருந்தன
போரில் தோற்ற மக்களின்
கடவுள்கள் முடக்கப்பட்டன,
வசிப்பிடங்கள் தீயிட்டு கொளுத்தப்பட்டன
கதையின் அதிகாரத்தைக் கைப்பற்றும் முயற்சியில்
புரட்சிக்குழு ஒன்று உருவாகியிருந்தது
கதையின் வார்த்தைகளைக்கொண்டு
ஆயுதங்களை தயாரித்துக்கொண்ட
அக்குழு என்னைக் கொலை செய்யும் பொருட்டு
என்னைத்தேடிக் கதையின்
முப்பத்தியிரண்டாவது பக்கம் வரை
முன்னேறி வந்திருந்தது
கதையின் பதினெட்டாம் பக்கத்தில்
இருபத்திமூன்றுயெழுத்துக்களால்
குவிந்திருந்த சொல்லொன்றின்
பாழடைந்த குகைக்கோவில் ஒன்றில்
ஒளிந்துகொண்டிருக்கும்
என்னை கண்டுபிடித்துவிடுவார்களோ என்கிற பயத்தில்
உடனடியாக அந்த இருபத்திமூன்றுயெழுத்துச் சொல்லை
நான் தடைசெய்யப்பட்டச் சொல்லாக
கதைமுழுவதற்குமான அறிவிப்பொன்றை செய்துவிட்டு
அந்தச்சொல்லை கதையிலிருந்து
தணிக்கை செய்தேன்

04.01.2010

- சொல் என்றொரு சொல் புத்தகத்தின் இருள் நகரத்தில் வசிக்கும் ஆத்மார்த்தி, அரூபதர்ஷினி, பிரபஞ்சனா, விமோசனா, பிரேம் - ரமேஷ், நன்மொழித்தேவன், அடர்கானகப்புலி மற்றும் அதீதன் நினைவாக எழுதியது..

இப்புத்தககண்காட்சியில் ரமேஷ் - பிரேமின் சொல் என்றொரு சொல் புத்தகம் வாங்கி மாய உலகின் போதையில் மூழ்கி இன்புறுங்கள்.
புத்தகம் பற்றிய அய்யனாரின் பதிவு :
சொல் என்றொரு சொல் ரமேஷ்-ப்ரேம் - 1
சொல் என்றொரு சொல் ரமேஷ்-ப்ரேம் - 2

உரையாடல் கவிதைப்போட்டிக்காக எழுதியது..
உரையாடல் போட்டி பற்றிய விவரங்கள்..

மழையில் பெய்த பூனைகள் (அ) கலைந்து போனக் கவிதைகள்..

2009-10-28T18:16:00.005+05:30

எப்போதோ
கவிதைகளால் நிரப்பி வைத்திருந்த
நோட்டுப்புத்தகமொன்றின்
எதிரெதிர் பக்கங்களில் இருந்த
மழையைப் பற்றியக் கவிதையும்
பூனைகளைப் பற்றியக் கவிதையும்
ஒட்டி கலந்திருந்தது..
அக்கவிதையில்
தற்போது பெய்து கொண்டிருக்கும்
பின் மாலை பெருமழையில்
அதிசயமாய் பூனைகள் விழ துவங்கின..
பேரதிசயமாய் அவற்றில் சில
உயிரோடுமிருந்தன..
பயமும்
அதிர்ச்சியும்
பாதுகாப்பின்மையும் ஒரு சேர
மியாவ் மியாவ் மியாவ் மியாவ்..

சிறுது நேரத்திலேயே
இயல்பு நிலை திரும்பி
அவற்றுள் தத்தம் துணைகளைத்
தேடத் துவங்கினப் பூனைகள்..
இதுதான் சரியான சந்தர்ப்பமென்று
இக்கவிதைக்கு மறுபுற பக்கத்துக் கவிதையில்
வாழ்ந்துக்கொண்டிருக்கும்
'மாயவன்'
ஒரு பூனையாய் உருமாறி
தனக்கானத் துணைப்பூனையை தேடத்துவங்கினான்
இக்கவிதைக்குள் ஊடுருவி..

28.10.2009
Raining Animals

கனவில் வந்துகொண்டிருக்கிற பாம்பு (அ) பாம்பொன்றின் சுவை..

2009-09-30T18:52:00.001+05:30

கடந்த இருபத்தி மூன்று நாட்களாக
பறக்கும் பாம்பு ஒன்று
கனவில் வந்து கொண்டிருக்கிறது
இறக்கைகள் ஏதுமின்றி
தரையில் ஊர்வதை போலவே
வானில் பறக்கிறது (ஊர்கிறது) அது
எனை தீண்டும் வன்மம்
அதன் கண்களில் இருப்பதாய் தோன்றுகிறது
பயந்து ஓடுகிறேன்
பின் மூச்சிரைத்து வீழ்கிறேன்
தரை இறங்கி வந்து
என் நாவை
அதன் நாவால் தீண்டிவிட்டி போகிறது
அந்த சுவை எனை கிறங்க வைக்கிறது
மயக்கம் கரையும் வேளையில்
எழுந்து பெரும் கூச்சலிட்டபடி
காடுகளுக்குள் ஓடி மறைகிறேன்

30.09.2009

And, Now... (அ) மாய உலகில் வாழ்தல்..

2009-08-25T14:36:00.011+05:30

எப்போதோ
என்னிடம் வந்து சேர்ந்திருந்தது அது.
encyclopedia கண்டிராத உருவமுடைய
அது எது என்பது கூட தெரியாமலேயே
வளர்க்க துவங்கினேன்.
என்பதனால்
அதற்கு நான் பெயரும் வைத்திருக்கவில்லை.
எதை உண்ணக் கொடுத்தாலும்
என்னை மட்டும் சாப்பிட்டுவிட்டு
அறையின் மூலையில்
உறங்க துவங்கும்.
மாயக்கனவுகளால் நிறைந்திருந்தது வாழ்க்கை.

காரணங்கள் உதித்திராத
ஒரு தினத்தில்
அது என்னை விட்டு அகன்றது.
இப்போதெல்லாம் நானே
என்னை தின்று கொள்கிறேன்..

25.08.2009

பின்குறிப்பு : இந்த And, Now பதிவு எழுதவில்லை என்றால் பதிவர் சங்கத்தில் இருந்து விலக்கி வைக்கப்படுவார்கள் என்பதை அறிந்தேன். என்பதானால் ஓடோடி வந்து இங்கு நானும் 'பதிவர்' என்பதை உறுதி செய்கிறேன்.. அப்பாலிக்கா மீட் பண்ணுவோமா.. :)

ஆரம்பிச்சு வச்ச நல்லவங்க : சந்தனமுல்லை, ஆயில்ஸ், நிஜம்ஸ், தமிழ் பிரியன், ஜமால், நான் ஆதவன், தமிழன் கறுப்பி, ஸ்ரீமதி, முத்து லட்சுமி, கானா பிரபா, சின்ன அம்மிணி.. ஸ்ஸப்பா.. இப்பவே கண்ண கட்டுதே..
.

சொற்களினால் கொலைகளை நிகழ்த்துதல் (அ) சொல் விளையாட்டு (Cross Word)

2009-07-24T02:29:00.000+05:30

உன்னை நான்
கொலை செய்யாமலிருக்க
ஒரே ஒரு காரணம் சொல்
ஒரே சொல்லில்
உன் காரணத்தை சொல்
ஒரு சொல் உன்னை காப்பாற்றக்கூடும்
அது எந்த சொல்

நீ வேறொரு சொல்லை கொண்டு
என்னை பதிலுக்கு
கொலை செய்ய முடியும்
உன்னிடத்தில் இருக்கிறதா அந்த சொல்*

அச்சொல்லினால் நீ என்னை
கொலை செய்யும் பட்சத்தில்
நான் தற்கொலை செய்து கொண்டதாகவே
கருதுவேன்

21.07.2009

* உனக்கு தெரியாமலேயே உன்னிடத்தில் இருக்கிறது அந்த சொல்

டியூப் லைட்..

2009-07-21T00:38:00.007+05:30

மாலை விழுந்து
இரவெழும் நேரத்தில்
இந்த நீண்ட ரயில் நடைமேடையின்
அனைத்து டியூப் லைட்டுகளும்
துவக்கப்பட்டன
பல டியூப் லைட்டுகள்
சட்டென்று எரிய துவங்கின
சில டியூப் லைட்டுகள் கொஞ்ச நேரம் துடித்து
பின் எரிய துவங்கின
என் தலைக்கு மேல் இருந்த ஒன்று மட்டும்
எரியாமல் துடித்து கொண்டே இருந்தது
எரிகிற டியூப் லைட்டுகள்
நடைமேடையின் ஏனைய மனிதர்களையும்
என் தலைக்கு மேலிருக்கும் எரியாத டியூப் லைட்
என்னையும் பிரதிபலிக்கிறதோ
என்று ஏதேதோ எண்ணங்கள்
பயமாய் திரிய துவங்க
எரிகிற டியூப் லைட்டொன்றின் கீழ் சென்று
நின்று கொண்டேன்
யாரும் கவனிக்கும் முன்பு

21.07.2009

பிற சேர்க்கை 1 : கடந்த வாரயிறுதியில் தோழி ஒருத்தியுடன் பேசி கொண்டிருந்தபோது, கடைசியாக அவள் சொன்னது "சரியான டியூப் லைட்டுடா நீ "

பிற சேர்க்கை 2 : இன்று காலை எனது அறையின் டியூப் லைட் பழுதாகிபோனது.

பிற சேர்க்கை 3 : SAW (I) படத்தின் முதல் காட்சி டியூப் லைட் ஒளிர துவங்குவதில் இருந்து துவங்குகிறது.

குரல்களால் தீர்மானிக்கப்படுகிறவன் (அ) கொலைக்கு சாக்கு போக்கு சொல்லுதல்..

2009-06-29T18:31:00.001+05:30

உன்னை கொலை செய்ய
விரும்பவில்லை.
ஆனால்
ஏதேதோ என்னை தூண்டுகிறது
உன்னை மட்டும் கொலை செய்ய.
காதலியை கொலைசெய்வது
பரமசுகம் என்கிறது உள்ளுக்குள்
ஒரு குரல்.
அவள் பிரிந்து சென்ற
நம்பிக்கை துரோகத்துக்கு
பழிவாங்க வேண்டுமென்கிறது
ஒரு குரல்.
உனக்கு கிடைக்காதவள்
வேறு எவனுக்கும் கிடைக்ககூடாதென்கிறது
ஒரு குரல்.
அவளை கொலை செய்துவிட்டு
நீயும் தற்கொலை செய்துகொள் என்கிறது
ஒரு குரல்.
குரல்களால் தீர்மானிக்கப்படுகிறேன்
நான்.

12.02.2009

ரொம்ப நாள் முன்னாடி எழுதி draft-ல் இருந்தது.. வேறு எதுவும் புதுசா எழுதவில்லை என்பதனால் இதை publish பண்ணிட்டேன்.. :)

மழைக்கால கொடுங்கனவு..

2009-06-18T18:28:00.002+05:30

மழைக்கால இரவுகளில்
நெடுஞ்சாலைகளில்
சீறிப்பாயும் வாகனங்களில்
நசுங்கிச் சாகும்
தவளைகளும் நத்தைகளும் சிறுஆமைகளும்
ஆவியாய் வந்து
என் கனவுகளில்
என்னை வேட்டையாட துவங்கும்
என்கிற பயத்தினாலேயே
மழைக்கால இரவுகளையெல்லாம்
விளக்குகளை அணைத்துவிட்ட
அறையின் மூலையில்
தூங்காமல் அமர்ந்தபடி கழிக்கிறேன்..
எனினும் பயமாயிருக்கிறது.
18.06.2009

வேண்டுகோள் : நான் சிறுகதையெல்லாம் எழுதினது இல்லை. எழுதவும் தெரியல.. ஏற்கனவே ஆதி அண்ணா எப்படி சிறு கதை எழுதறதுன்னு பதிவு போட்டு சொன்னாரு.. அதைவிட சிம்பிளா ("சிறுகதை for Dummies", "சிறுகதை writing in 24 hrs, in a week, in 10 days", மாதிரி), யாராச்சும் சொல்லிட்டு போனா புண்ணியமா போகும்.. இன்னும் பத்து நாள்தான் இருக்கு..

கண்ணாடியாலான கவிதை..

2009-06-08T01:26:00.001+05:30

இக்கவிதையை படித்த பின்புதான்
என்னுடைய உண்மையான முகத்தை
நீ தெரிந்துக் கொண்டதாகவும்
நான் ஒரு துரோகி என்றும்
கொலைகாரன் என்றும்
சுயநலன்களுக்காக
பிறர் வாழ்வைக் கெடுக்கவும் துணிபவன்
என்றும்
மேலும் இன்ன பிற
கெட்டவார்த்தைகளாலும் திட்டிவிட்டு
நகர்ந்தாய்,
நான் இக்கவிதையை
முகம் பார்க்கும்
கண்ணாடியால் செய்திருந்தேன்
என்பதை உன்னிடம் சொல்வதற்கு
முன்பாகவே.

20.05.2009

அதிர்வுகள்..

2009-06-01T01:00:00.000+05:30

இன்னமும்
மொழி ஊடுருவியிராமல்
எஞ்சி கிடக்கும் ஆழ்மனப்பரப்பில்
புலன்கள் பற்றியெரிய
பயணிக்கிறாய் நீ..
என்னில் நிகழ்த்தும்
உன் பயணங்களின் அதிர்வுகளைக்
குறிப்பெடுக்கவும் முடியாமல்
உன்னிடம்
அதைத் தெரிவிக்க
மொழியும் இல்லாமல்
உன் பாதச்சுவடுகளை மோகித்து
கிடக்கிறேன்..

14.05.2009

இரையாகுதல்...

2009-05-14T16:27:00.000+05:30

பின்னிரவு மழை நாளொன்றில்
என் அறையில் நடந்த
சம்பவம் இது.

எப்படியோ உள்நுழைந்திருந்த அதற்கு,
வெளிறிப்போன முகத்தோடு
இருக்கும் என்னை
உறுமியபடியே
சுற்றி சுற்றி வந்து
மேலும் பயமுறுத்துவது
வேடிக்கையாக இருந்திருக்கூடும்..

அதிரவைத்த இடியொன்றினால்
மின்சாரம் துண்டாகி
சட்டென்று அறையை இருள் கவ்வ
நான் எங்கேனும்
தப்பித்திடுவேனோ என்ற எண்ணத்தில்
அவசரமாய் என் மீது பாய்ந்தது அது..

நான்
அதன் இரையாகி தீர்ந்திருந்தேன்
மின்சாரம் வருவதற்கு முன்பாகவே

05.05.2009

தற்கொலைக் குறிப்புகள் - 1

2009-05-10T23:51:00.003+05:30

கலங்கரை விளக்கத்தின்
மெல்லிய ஒளி
அலுவலக மொட்டை மாடியைத்
தழுவிச் சுழலும்
இந்த பின்னிரவு வேளையில்
மே மாதத்தின் - "மின்னலே நீ வந்ததேனடி"
பாடலை ஒலிக்கவிட்டு
கேட்டுக்கொண்டிருக்கிறேன்..

மாடியிலிருந்து
கீழேக் குதித்து
தற்கொலை செய்துகொள்வது
உச்சக்கட்ட சுதந்திரம் என்று
சொல்லிவிட்டுப் போகிறது ஒளிக்கீற்றொன்று
பாடலின் இடையிடையே

07.05.2009

அய்யனாரின் வ.வெ.தொ.அ.வெ.கு 1,2,3.., கிருத்திகாவின் முகமூடி கவிதைகள் 1,2,3.., மாதிரி தற்கொலை குறிப்புகள்-1.. ஆனா 2,3,4... வருமா என்றெல்லாம் எனக்கும் தெரியாது.. :)

பறவையை உருவாக்கும் நிறம்.. (அ) பூ நிறத்திலொரு பறவை..

2009-05-08T03:11:00.003+05:30

பூவொன்றின் நிறத்திலிருந்து
வழிந்து
பெருகுகிறது
ஒரு பறவை..

06.05.2009

எல்லாருக்கும் ஒரு சின்ன வேண்டுகோள் : என்னோட வலைப்பக்கத்துக்கு நிறைய பேர் தொடுப்பு கொடுத்து இருக்கீங்க.. நிறைய பேர் வலைப்பக்கத்தில "கவிதைகள் எனப்படும்" என்ற பெயரிலேயே இன்னும் தொடுப்பு இருக்கு.. அதை தயவு செய்து "கனவில் தொலைதல்" அப்படின்னு மாத்திடுங்களேன்.. ப்ளீஸ்..

..........

2009-05-04T03:05:00.000+05:30

இப்போதைய மனநிலை
அவ்வளவு பதட்டம் மிகுந்ததாய்
இருக்கிறது..
வார்த்தைகளை ஒருமித்து
பிழைகள் இல்லாமல்
கோர்வையாய் சிந்தித்தல்/எழுதுதல் கூட
அத்தனை சிரமம் மிகுந்ததாய்
இருக்கிறது..
சிகரெட் பிடிக்கவோ அல்லது
மது அருந்தவோ பழகி இருந்திருந்தால்
கொஞ்சம் ஆசுவாசமாய்
இருந்திருக்குமோ..

20.04.2009

இப்போதெல்லாம் எதையும் எழுத முடியவில்லை. எதையும் சிந்திக்க கூட இல்லை. ஒரு வேளை என்னிடம் காலியாயிடுச்சோ. இல்லை, மனசு சோம்பேறி ஆயிடிச்சோ.. என்னவோ தெரியல.

ஒருவேளை அடுத்து இந்த தளத்தில் எதையும் பதிவிடாத பட்சத்தில், திரும்பி போயிடாதீங்க. திரைப்படங்களும் நானும் தளத்தில் சந்திக்கவும்.. ஒரு வாரத்திற்கு ஐந்து முதல் பத்து படங்கள் பார்ப்பதால் அந்த தளம் நிச்சயம் ஆக்டிவா இருக்கும்.. :)

சொல்லாமல் மறைத்த ஒன்றினால், இரண்டு கொலைகள் மற்றும் ஒரு தற்கொலை..

2009-04-21T11:11:00.002+05:30

தற்கொலை செய்து கொள்ளப் போகிறேன்..
அதற்கு முன்பாக
உன்னைக் கொலை செய்யத்
திட்டமிட்டிருக்கிறேன்..
உன்னிடமிருந்து
இதுநாள்வரை மறைத்திருந்த
அதை சொல்லிவிடவே எண்ணினேன்;
அல்லது ஒரு கடைசிக் கடிதமாக அதை எழுதி
உனக்குத் தெரியப்படுத்தவும் விரும்பினேன்..
ஒரு வேளை
உன்னிடம் அதை பகிர்ந்துவிடும் பட்சத்தில்
இந்தக் கொலை மற்றும் தற்கொலைக்கான
முன்காரணம் ஏதும்
இல்லாமற் போய்விடும் என்பதால்
அதை உனக்குத் தெரியப்படுத்தாமல்
உன்னைக் கொலை செய்யவும்
பின்பு தற்கொலை செய்து கொள்ளவும்
விரும்புகிறேன்..

21.04.2009

?

2009-04-18T18:50:00.002+05:30

நேற்று
உன்னை
கடைசியாக சந்திக்கநேர்ந்தது.
அது
இழப்பா
அல்லது விடுதலையா?

17.04.2009

தமிழ்ப் பின்நவீனத்துவமும்; ரமேஷ் பிரேமும்; பேச்சும் மறுபேச்சும்

2009-04-16T03:23:00.008+05:30

இந்த பதிவுலகத்தில் அதிகமாக உபயோகபடுத்தப்படும் வார்த்தைகள் இரண்டு. 1.ரிப்பீட்டேய் ; 2.பின்நவீனத்துவம்
சில இழப்புகளின் பதிலீடாக தமிழ்ப் பதிவுலகம் பக்கம் வந்த எனக்கு, இந்த பின்நவீனத்துவம் என்கிற வார்த்தை முதலில் மிரட்சியை தந்தாலும், பின்பு, இது இன்னொரு வித தேடலை உருவாக்கும் என்று நம்ப துவங்கினேன். அதே நேரத்தில் பெரிய பசங்க சிலரின் எழுத்தின் சுவாரஸ்யம் காரணமாக, சில புத்தங்களின் அறிமுகம் கிடைத்தது. சமீபத்தில் புத்தக கண்காட்சியில் சில புத்தகங்களை வாங்க நேர்ந்தது. நகுலன் மற்றும் சாருவின் ஒரு நாவலை இருபது பக்கங்கள் கூட தாண்டமுடியாமல் வைத்துவிட்டேன்.. குருவி தலையில பனங்காயாகிவிட்டது.

அப்போது வாசிக்க துவங்கிய இரு கட்டுரை புத்தகங்கள்தாம் ரமேஷ்-பிரேமின் கட்டுரையும் கட்டுக்கதையும் மற்றும் பேச்சு-மறுபேச்சு.. நல்ல புத்தகங்கள். நிச்சயம் ஒரு பெரிய வாசிப்புக்கு தயார்படுத்தும். இந்த பதிவில் பேச்சு மறுபேச்சு புத்தகத்தில் இருக்கும் ஒரு கட்டுரையின் சில பத்திகளை பதிவிடலாம் என்று எண்ணுகிறேன்.

மேற்கின் பின்நவீனத்துவம் : பின்நவீனத்துவம் என்பது மேற்கின் தத்துவ, அரசியல், அழகியல் மரபுகளை மாற்று, உப தத்துவ, அழகியல், தத்துவ மரபுகளின் மூலம் கேள்விக்குட்படுத்தி, உள்வெளியாக ஆராய்ந்து, மாற்றுப் பார்வைகளை முன்வைத்த ஒரு தொகுப்பறிவு முறை. இதில் அறம் என்பதும், மற்றவற்றிக்கான இடம் என்பதும் முக்கிய இடம்வகிப்பவை. அதே சமயம் இது ஒற்றைத் தன்மை உடையதல்ல. பேரழிவை நிகழ்த்திய இரண்டு உலகப் போர்களைக் கண்டு ஃபாசசிம், ஸ்டாலிசம் என்ற போக்குகளால் தாக்கப்பட்ட ஐரோப்பிய அறிவுத்துறையினரும், கலைஞர்களும் அவர்களது தத்துவ மதிப்பீடுகளைக் கேள்விக்குட்படுத்திய போது, பின்நவீனத்துவ நிலையைக் கண்டடைந்தனர். மேற்குலகின் வரலாறு, இறையியல், அரசியல், அறவியல் அனைத்தையும் மறுக்கவும், மறுபொருளாக்கம் செய்யவும் இக்காலம் பயன்பட்டது. எப்பொழுது நவீனத்துவமும், அறிவியக்கமும் தோன்றியதோ, அப்பொழுதே பின்நவீனத்திற்க்கான அடிப்படைக் கேள்விகளும் அங்கு உருவாகிவிட்டன. விமர்சன பார்வையும், அதிகார மறுப்பும் இதன் அடிப்படைகளாக அமைந்தவை. ஒற்றை மூலமும், ஒற்றை முடிவும் இல்லை என்று வேறுபாடுகளின், வித்தியாசங்களின் இருப்பை அங்கீகரித்து, அவற்றின் அழகைக் கொண்டாடுதல் இதன் முக்கியக் கூறு. மேற்கே மேற்கை சிதைவாக்கம் செய்துகொள்ளும் காலமே மேற்கின் பின்நவீனத்துவ இயக்கம் அல்லது போக்கு.

தமிழ்ப் பின்நவீனத்துவம் : ஆனால் இந்திய தமிழ்ச் சூழலில் பின்நவீனத்துவம் என்பது வேறுபட்டது. வேறுபட்டு இருக்க வேண்டியது. தமிழில் நீண்ட மரபுடைய தத்துவ ஆய்வு நவீனத்தளத்தில் முறையாக விவாதிக்கப்படவில்லை. முடிவுகள் மட்டுமே இங்கு வைக்கப்படுகின்றன. அவற்றை கண்டடையும் வழிகள் மறைக்கப்படுகின்றன. இதனால் தமிழ் பின்நவீனத்துவம் என்பது இன்னும் ஆய்ந்தறிய வேண்டிய நிலையிலேயே உள்ளது.
தமிழ்ப் பின்நவீனத்துவம் பற்றி ஆய்வு செய்யும் யாருக்கும், தமிழ் வரலாறு, தமிழின் மாற்று வரலாறு, தமிழ் உப மரபுகள், மாற்று சிந்தனைகள், இலக்கியப் பன்மை மரபுகள் பற்றிய அடிப்படையான மரபும், அக்கறையும் தேவை. தமிழிலக்கியத்தையும், இலக்கிய கோட்பாடுகளையும், தமிழிலுள்ள ஆயிரக்கணக்கான கதையாடல் வடிவங்களையும் முழுமையான நுண் வாசிப்பிலும், மறுவாசிப்பிலும் அணுகிய பிறகே, தமிழில் பின்நவீனத்துவம் பற்றியும் தமிழ்ப் பின்நவீனத்துவம் பற்றியும் நாம் பேச முடியும்.

பின்நவீனத்துவ வாசிப்பு : பின்நவீனத்துவ நாவல் என்றோ, பின்நவீனத்துவ சிறுகதை என்றோ உலகில் எங்கும் எதுவும் இல்லை. பின்நவீனத்துவ வாசிப்பு மட்டுமே. Nouveau Roman, Meta Fiction நாவல், Hyper Reality நாவல், Sur-Fiction, Palimpsest History நாவல், Magical Realism நாவல், Ethnographic நாவல், Mythographic நாவல் என ஒவ்வொரு நாவலாசிரியரும், தமக்குகந்த அடையாளம் தந்து, தமது நாவல்களை உருவாக்குகிறார்கள். இவை அனைத்தையும் பின் நவீனத்துவ கால எழுத்துக்கள் என்று விமர்சகர்கள் குறிப்பிட்டு, பின்நவீனத்துவ வாசிப்புக்கு உட்படுத்துகிறார்கள். ஏனெனில் பழைய முறையிலான வாசிப்பு, எதையும் மேலோட்டமாக வாசித்து, ஒற்றை முடிவை, ஒற்றை மையத்தைக் கூறிவிடும். ஆனால், பின்நவீனத்துவ வாசிப்பு பலவகையாக பிரதியை அணுகி, அதன் பல தளங்களில் பயணப்பட்டு, அதுவும் ஒரு படைப்பு போல தன்னை வடிவமைத்து கொள்ளும். அதனால், பின்நவீனத்துவ வாசிப்பு, பின்நவீனத்துவ விமர்சனம், பின்நவீனத்துவ ஆய்வு போன்றவை மட்டும்தான் உண்டே தவிர, பின்நவீனத்துவ நாவல் என்று எதுவும் கிடையாது. அது மட்டும் அல்ல. பின்நவீனத்துவ வாசிப்பு, பின்நவீன காலப் பிரதிகளை மட்டும்தான் இப்படி பொறுப்புடன் ஆழமாக பன்முகத் தன்மையுடன் வாசிக்கும் என்பதல்ல; ஒரு வேத நூலையும், ஒரு மொழியில் முதன்முதலில் எழுதப்பட்ட புராணத்தையும் கூட சிரத்தையாக வாசிக்கும்.

தமிழில் எல்லாவிதமான கதையாடல்களும் வரவேண்டும். எதார்த்தவாத, இயற்கையியல்வாத, வெளிப்பாட்டிய வாத, மனப்பதிவு வாத, நினைவோட்ட உத்தியுள்ள, புராணத் தன்மையுள்ள, தொன்மத் தன்மையுள்ள, சித்தர் நடையுடைய, சொல்கதை மரபுள்ள, ஆவணப் படுத்தல் உத்தியுள்ள, வரலாற்று வாய்மொழி மரபுள்ள....... என நூற்றுக்கணக்கான கதையாடல்கள் பல்கிப் பெருகவேண்டும். இவற்றை பொறுப்புடன் வாசிப்பதுதான், வாசித்து அவற்றின் பன்முகத் தன்மையை பல தள அர்த்தத்தை வெளிப்படுத்துவதுதான் தமிழில் பின்நவீனத்துவத்தின் வேலை. இதில் பின்நவீனத்துவ உப்பு இல்லை. பின்நவீனத்துவ காரம் இல்லை என்று சொல்வது அரசியல் ஆதிக்கக் கதையாடல். இலக்கியத்திற்கும் இதற்கும் சம்பந்தம் கிடையாது.

தமிழ் வாசகர்களுக்கு ஒரு வேண்டுகோள் : தமிழில் சங்க இயக்கியங்கள் தொடங்கி, இன்றைய சிறுகதைகள் வரை, உலக இலக்கியங்களுக்கு ஈடு செய்யும் ஏராளமான படைப்புகள் உள்ளன. அளவிலும் கூட, தமிழிலக்கியம் பெரும் பரப்பை உடையது. இவற்றை பலவகை சிந்தனை முறைகளை பின்னணியில் நுணுகி வாசித்து, உலக இலக்கியத் தளத்துடன் உரையாடலைத் தொடங்கவும், வளர்க்கவும் பின்நவீனத்துவப் பார்வையும், வாசிப்பும் மேலும் வழி அமைத்துத் தருகிறது. சிரத்தையுடன் அதைப் பயின்று, புதியன படைக்க வேண்டியது தமிழ்ச் சமூகத்தின் அறிவுத் தளமும் இயக்கமும் அழிந்து போகாமல் காப்பதற்கான காலத்தின் தேவை.

வாசகா; வாசகி : ஒரு நாவல் எழுதுவதென்பது எளிதான வேலை அல்ல. கடுமையான உழைப்பைக் கோருகிற விஷயம் அது. பன்முகப்பட்ட வாசிப்பும் பயிற்சியும் அதற்கு தேவை. என்பதனால் வாசிப்பு என்பதற்கும், பன்முகப்பட்ட வாசிப்பும் பயிற்சியும் உழைப்பும் தேவை.
-- தீராநதி டிசம்பர் 2003

புத்தகம் : பேச்சு - மறுபேச்சு (பின்நவீனத்துவம் நோக்கி)
எழுதியவர் : ரமேஷ்-பிரேம்
பதிப்பகம் : மருதா
விலை : Rs.150

நெற்றி பொட்டில் அடித்தாற்போல் இதுதான் பின்நவீனத்துவம் என்று சொல்வது அல்ல இக்கட்டுரை. மாறாக ஒரு எளிய வழியில் பின்நவீனத்துவம் பற்றிய பேச்சை ஆரம்பித்து வைக்கிறது.

தொடர்புடைய சுட்டிகள் : அய்யனாரின் இந்த பதிவு. இந்த பதிவுக்குள் சில சுட்டிகள் இருக்கும், அதை தொடரவும்.

Nouveau Roman, Meta Fiction, Hyper Reality, Sur-Fiction, Palimpsest History, Magical Realism, Ethnographic, Mythographic & etc - இந்தக் கூறுகளை அல்லது வகைகளை யாராவது விளக்கமாக எழுதியிருக்கிறார்களா அல்லது எழுத முன்வருவார்களா... உதவியாக இருக்கும்.. எனக்கு தெரிந்து, அனுஜன்யா, Magical Realism பற்றி கொஞ்சம் எழுதி இருக்கிறார்.

மேலும், இந்த கட்டுரையை வாசிப்போர்கள் பின்னூட்டத்தில் உங்கள் கருத்துக்களையோ சொல்லவோ, தொடர்புடைய சுட்டிகளை தெரியப்படுத்தவோ அல்லது சந்தேகங்களை கேட்கவோ கேட்டுக்கொள்ளப் படுகிறார்கள்.
வளர்மதியோ, அய்யனாரோ, சுந்தரோ, ஜமாலனோ, பைத்தியக்காரனோ, டிசே தமிழனோ, நாகார்ஜுனனோ மேலும் வலையில் இயங்கும் அத்தனை பெரிய தலைகளும், நமக்கு உதவுவார்கள் என்று நம்புகிறேன்.

அடுத்தபதிவில் ரமேஷ்-பிரேமின் கொலை மற்றும் தற்கொலை பற்றி மற்றும் சக்கரவாளக் கோட்டம் கவிதைத் தொகுதிகள் பற்றி..

வெறும் சொற்கள்..

2009-04-14T03:57:00.008+05:30

காலத்தை தின்று வாழும் பறவைகள்

அறையின்
சுவர்க்கடிகாரத்திலிருந்து
நொடிநொடியாய்
விழுந்துகொண்டிருக்கிறது காலம்..
கீழே
சில பறவைகள் மேய்ந்து கொண்டிருக்கின்றன..

17.03.2009

--OOO--

நெய்தல் நிலத்து பறவையொன்று

நெய்தல் நிலத்து பறவையொன்று
பறந்தபடி
வெகுநேரமாய் என்னை
அவதானித்துக்கொண்டிருக்கிறது.
நான்
அலைகளின் மீது
தப்பித்தலுக்கான ஒத்திகையில் இருக்கிறேன்..

17.03.2009

--OOO--

சொற்களும் நானும்

சொற்கள்
சிக்கலானவை..
மனதின் நிகழ்வுகளை
சொற்களை கொண்டு பிரதியெடுக்க
முயற்சிக்கும் போதெல்லாம்
ஏதேதோ சொற்கள்
முளைக்கின்றன மொழியறிவின் கட்டுக்குள்..
உள்ளுக்குள் உருவாகும்
சொற்களை
அதன் போக்கில் விட்டுவிட்டால்
சொற்கள் எப்படி எப்படியோ உருமாறி
கடைசியில் அர்த்தமற்று போய்விடுகின்றன..
இறுதியில்
எப்போதும் போல்
தனித்து எச்சமாகிறேன்...
சொற்களற்ற பிரதியாகிறேன் நான்..

05.01.2009

--OOO--
குறிப்பு : இப்போதெல்லாம் எதுவும் விருப்பதிற்குரியதாய் இல்லை..

வட்டத்திற்குள் பெண்.. [தொடர் பதிவு]

2009-04-10T01:41:00.002+05:30

அண்ணன் எம்.எம்.அப்துல்லா, இந்த தொடர் பதிவிற்கு அழைத்திருந்தார்.. நானும் எழுத வேண்டும் என்று நினைத்து நினைத்து, நாட்கள் கடக்கிறது.. எனக்கு இது ஒரு கடினமான தொடர் பதிவு.. இந்த தலைப்பில் எனக்கு உடன்பாடு கூட இல்லை..

அதிலும் தலைப்புக்குள் எதையும் எழுதவும் தெரியாதெனக்கு..

உன்னிடமிருந்து
விலகி ஓட
எத்தனித்து எத்தனித்து
உன் வட்டங்களுக்குள்ளேயே
விழுந்து
வீழ்கிறேன்..
நீ ஒரு புதைக்குழி.

இப்படி ஒரு காதல் தோல்வி கவிதையை தான் எழுதமுடிகிறது.. வேறு எழுதலாம் என்று நினைத்தபோது, எதை எழுதவேண்டுமென்று கூட எனக்கு தெரியவில்லை.. பெண்களின் பார்வையில், இந்த தலைப்பை பற்றி சிந்தித்து (?!) எழுதலாம் என்று நினைத்தபோது, பெண்களின் பார்வை சிக்கவில்லை.. :)

வட்டத்திற்குள் பெண்.. என் வாசிப்பு வட்டத்திற்குள் இருக்கும், இங்கு வலைத்தளத்தில் எழுதும் நிறைய பெண்களில், எனக்கு பிடித்த பெண் கவிஞர் ஒருவரின் கவிதையை இங்கு பதிவிடலாம் என்று எண்ணுகிறேன்.. பிடித்த கவிதாயினி ஒருவரை இப்பதிவை தொடர அழைக்கலாம் என்று எண்ணுகிறேன்..

அனிதா.. இவரின் கவிதைகளை நீங்கள் படித்திருக்கக்கூடும்.. அவ்ளோ அழகா எழுதுவாங்க.. சமீபத்தில் (மார்ச் முதல் தேதி) ஒரு அழகிய பெண் மகவை பெற்றிருக்கிறார்கள்.. மேலும் அவர்களின் கவிதை தொகுதி, உயிர்மை பதிப்பகம் மூலம் புத்தகமாக வந்து இருக்கிறது.. இந்த இரட்டிப்பு மகிழ்ச்சியை இந்த பதிவில் எழுதி இருக்கிறார்கள்.. அவருக்கு இந்தப் பதிவின் மூலமும், என் அன்பும் வாழ்த்துக்களும்..

அவரின் சில கவிதைகள் இதோ..

கற்பு...

இரவு நேர பேருந்து பயணத்தின்
அரை உறக்கத்தினூடே...
ரகசியமாய் இடை வருடும்
பின் இருக்கை மிருகம்...

காமமும் கோபமும்
ஒருசேர கிளர்ந்தெழ,

வருடலின் சுகம் மீறியும்
"பளாரென" அறைகிறேன்...

என் வருகையை
எதிர்நோக்கி
தலையணை கட்டித்தூங்கும்-

கணவன் முகம் நினைத்து...

--OOO--

அடிமைகளை உருவாக்குவது எப்படி

மிக எளிது.
ஒரு புன்னகையில் துவங்கி
நட்பு, பிரியம் என மெல்ல, மிக மெல்ல
முன்னேறவும்.
உனக்கென நான் (மட்டுமே) இருக்கிறேனென
புரிதல் உண்டாக்கவேண்டும்

ஆரத்தழுவிக்கொள்ளலாம்
காமம் இல்லாமலும்
பின் காமத்தோடும்.

என்னைப் பிரிந்தால்
விஷப்பாம்புகளுக்கு இரையாவாய் என்றும்
எச்சில் இலைகளிலிருந்து
உணவு உண்ண நேரும் என்றும்
எச்சரித்தபடியிருப்பது உசிதம்

எண்ணற்ற முத்தங்கள்
நேரம் காலம் பார்க்காமல் தரவேண்டும்
பெறவேண்டும்.

வெளிர் நீல வானில்
பறவைகள் பறப்பதைக் காட்டுவது
சுதந்திரமாய் இருப்பதாய் நினைத்துக்கொள்ள உதவும்.

ஆயிற்று.
வருடத்திற்கோர் அடிமையை சுலபமாய் உருவாக்கலாம்

மிகக் கவனம்...
அடிமைகள் உங்களைப்பற்றி
பேசிக்கொள்ளாமல் பார்த்துக்கொள்ளவும்

--OOO--

அன்பின் விலைகள்

எதற்காகவோ கண் கலங்கியபடி
ஆட்டோவில் ஏறினேன்.

சத்தமின்றி விம்மத் துவங்கி
பின் உடைந்து பெரிதாய் அழவும்
ஆட்டோக்காரன் திரும்பிப்பார்த்துத் தயங்கி
அழாதீங்க என்றான்.

என் இடம் வந்ததும்
கொடுத்த இருபது ரூபாய்க்கு எட்டு ரூபாய் சில்லரை
எண்ணி கொடுத்துவிட்டு சென்றுவிட்டான்.

அந்த மீதி சில்லரையாவது வாங்காமல் விட்டிருக்கலாம்.

--OOO--

கதவு

கதவுகள் சூழ்ந்த அறையின் இருள் நீக்கி
பாதி திறந்திருக்கிறது ஒரு கதவு.

மயக்கம் தெளிந்தும்
கட்டப்பட்ட கைகளின் இறுக்கம் தளர்த்துவது
அத்தனை எளிதாய் இல்லை.

பாதி திறந்த கதவு வழி
உள்ளே வருகின்றன
பரிச்சயமற்ற குரல்கள்
தொடர்ந்து வீசுகிறது சாராய வாடை
எப்பொழுதுக்குமான இயலாமையில் அழைக்கின்றன
பிரியத்தின் குரல்கள்
அவ்வப்போது வரும் காற்று
தப்பித்தலுக்கான ஏக்கங்களை கூட்டிப்போகிறது

பாதி திறந்த கதவுகள் சுவாரஸ்யமானவை.
அவ்வளவே.

மூடிய கதவுகள் மூடியே இருக்கின்றன
எப்பொழுதுக்குமான உண்மைகளுடன்.

--OOO--

கவிதைகள் எப்படி இருக்கு?? அவங்களோட அனேகக் கவிதைகள் எனக்கு பிடித்தமானவை.. இந்த கவிதைகளெல்லாம் ஒரு அடையாளம் மட்டுமே.. அவங்க வலைத்தளம் சென்று அனைத்து கவிதைகளையும் படிக்கவும்.. அவ்ளோ அழகான கவிதைகள்..

சரி.. இந்த தொடர்ப்பதிவிற்க்கு நான் யாரை அழைக்க போகிறேன் என்பதை நீங்கள் அறிந்திருக்கக்கூடும்.. வேறு யார்.. கவிதாயினி ஸ்ரீமதி தான்.. ஏற்கனவே காணாமல் போன கனவுகள்! என்ற கவிதை தான், அவங்கள இந்த தொடர்பதிவுக்கு அழைக்க தூண்டியது.. [ஸ்ரீ, நீ கேட்கக்கூடும்.. "எங்கடா அந்த வழக்கொழிந்த சொற்களுக்கான தொடர் பதிவு" என்று.. அதற்கான வார்த்தைகளை நான் தேடிக்கொண்டிருக்கிறேன்.. கிடைத்ததும் எழுதுகிறேன்.. :)]

10.04.2009

கவிதை பரவும் வெளியின் வரைபடம்..

2009-04-06T10:45:00.002+05:30

உடலுக்குள்
கவிதை பரவும் வெளியின்
வரைபடம் தயாரிக்க திட்டமிட்டேன்..
ஒரு பெரிய வரைபட தாளும்,
பென்சிலும் எடுத்துக்கொண்டு,
ஏற்கனவே வாங்கி
பதப்படுத்தி வைத்திருந்த மனித உடலொன்றின்
வாய் வழி,
குப்பிகளில் வைத்திருந்த
பழையக் கவிதைகளை
ஒன்றொன்றாக செலுத்தி
கவிதை உடலுக்குள் பரவிய வெளியை
குறிப்பெடுக்கத் துவங்கினேன்..
சரியாக பதினேழாவதுக் குப்பியில் இருந்த
கவிதையை செலுத்திய போது
அவ்வுடல்
சிறகு கொண்ட பூனையாக மாற துவங்கியது..
பதினெட்டாவதுக் குப்பிக் கவிதையை
செலுத்துகையில்
கண்ணிமைக்கும் கணத்தில்
என்னையும்
மிச்சமிருந்த கவிதைக்குப்பிகளையும்
எடுத்து விழுங்கிவிட்டு
நெட்டி முறித்து
பறந்தது..

31.03.2009

வீண் விரயங்கள்...

2009-03-30T19:54:00.001+05:30

இன்று மாலை
வழக்கத்தை விட
அதிகமாகவே கோபித்து சண்டையிட்டான்..
அவன் இன்னும்
அதை மறக்கவில்லையென்றும்
நான் செய்தது பெரும் துரோகமென்றும்
வாதிட்டான்..
சில பொய்களை சொல்லி
அதிகமாகவே சரக்கு வாங்கி கொடுத்து
ஒருவாறாக சமாளித்து
அவனையும் அழைத்துக்கொண்டு
நடு இரவில்
வீடு திரும்புகையில்
யாருமில்லா சுரங்கப்பாதையில்
அவன் கழுத்தை இறுக்கிக் கொலைசெய்தேன்..
கடந்த முறை
அவன் சண்டையிட்டபோதே
கொன்றிருந்தால்
சில பொய்களையும்
சரக்கிற்கான காசையும் தவிர்த்திருக்கலாம்
என்றெண்ணியபடியே வீட்டுக்கு ரயிலேறினேன்..

27.03.2008

ரயில் செய்யும் இயந்திரவியல்..

2009-03-23T06:05:00.000+05:30

ரயிலொன்றினை வடிவமைக்கும்
இயந்திரவியல் நுட்பம்
தெரியுமெனக்கு.
ரயில் செய்யும் இயந்திரங்கள்தான் இல்லை.
என்றாலும்
வார்த்தைகளால்
ரயில் செய்யமுடியுமென்ற
நம்பிக்கைமட்டும் இருந்தது.
பலவாறாக முயன்று
வார்த்தைகளான ரயிலொன்றினை
செய்துமுடித்தேன்.
பின்பு
தண்டவாளமும்
சில ரயில் நிலையங்களும் இருக்கும்
இக்கவிதையை தேர்ந்தெடுத்து
வார்த்தைகளாலான ரயிலை ஓட்டி
பரிசோதிக்கிறேன்..
நீங்கள் இப்போது
இந்த ரயிலில் பயணித்துக்கொண்டிருக்கிறீர்கள்..

21.03.2009

பூனையாகுதல்...

2009-03-16T15:09:00.001+05:30

அவன் போய்விட்டபின்பு
சுற்றும் முற்றும்
யாரும் இல்லையென்பதையும் உறுதிபடுத்திவிட்டு
அவன் எழுதிய கவிதைக்குள்
எட்டிப்பார்த்தேன்..
அது ஒரு காதல் கவிதை..
வழக்கமான
சில மரங்களும்
அவற்றின் பூக்களும்
பறவைகளும்
பச்சைப் புல்வெளிகளும்
தூரத்தில் ஒரு பெரிய கடலும் கொண்டிருந்த
அக்கவிதையில்
கூடவே சில "அன்பே", "அழகே"
வார்த்தைகளுக்கு மத்தியில்
அவன் காதலி தனியாய் அமர்ந்திருந்தாள்..
நான்
அவன் முகம் போன்றதொரு
முகமூடியோடு
அக்கவிதைக்குள் இறங்கி நடக்க ஆரம்பித்தேன்
அவளை நோக்கி..

13.03.2009

தெரிந்துகொள்ள வேண்டாத ஒருவன் வசிக்கும் கவிதை.. [அ] முன்பின் தெரியாதவனை கொலை செய்தல்..

2009-03-08T19:20:00.000+05:30

நீங்கள்
தெரிந்து கொள்ள வேண்டாத ஒருவன்
வசிக்கும் இக்கவிதையை
இப்போது வாசிக்க துவங்கிவிட்டீர்கள்..
தன்னை தெரிந்துகொள்பவர்களை
பின்தொடரும்
மந்திரசக்தி கொண்ட அவன்
இந்த நேரத்திற்க்கெல்லாம்
அரூபமாய் உங்கள் அருகில் நின்றபடி
உங்களோடு இதை வாசித்து கொண்டிருப்பான்..
இனி எப்போதும்
உங்களை பின்தொடர்ந்தும் கண்காணித்தும்
உங்கள் தன்னிலையை உடைக்க முயலும்
அரூபனிடமிருந்து தப்பிக்க
உங்களுக்கு ஒரு வழி மட்டுமே இருக்கிறது..
புனைவுகளையும்
நம்பிக்கைகளையும் மட்டுமே
தின்று வாழ்கிற அரூபனையும்,
இக்கவிதையின் வார்த்தைகளையும்,
நம்பாமல்
நிராகரிக்கும் பட்சத்தில்
அடுத்த சில நொடிகளிலேயே
உங்களால் உணவு மறுக்கப்பட்டு
கொடும்பசியில் இறந்து போவான்..
அதாவது
இப்போது நீங்கள்
ஒரு கொலை செய்தாகவேண்டியிருக்கிறது
உங்களை காப்பாற்றிக்கொள்ள..

06.03.2009

காத்திருப்புகள்..

2009-03-03T19:38:00.000+05:30

உன்
நேசங்களுக்கான
என் காத்திருப்புகளை
சுடும் பாலை மணலில்
இரைக்காக
ஒளிந்து கிடக்கும் விஷப்பாம்பின்
காத்திருப்புகளாகக் கருதாதே..
அது
துளி மழைக்காக
காத்திருக்கும்
பாறையிடுக்குத் தேரையின்
காத்திருப்பையொத்தது..
என்றாலும்
உன் கருத்தியலை உண்மையென்றும்
என் வார்த்தைகளை பொய்யென்றும்
கொள்ள
உரிமையுண்டு உனக்கு.

03.03.2009

சதுரங்கம் - ஒரு விளையாட்டு

2009-02-25T12:11:00.010+05:30

சியர்ஸ்
என்றபடி பொங்கி வழியும்
மது கோப்பைகளோடு
சதுரங்கத்தில் காய்களை நகர்த்த துவங்கினோம்..
ஆட்டம் சூடுபிடிக்க
விறுவிறுப்பின் உச்சலாகிரியில்
நீ என் சிப்பாய்களையும் படைகளையும் வீழ்த்தி
ராணியை கவர்ந்து
பின் என்னையும் வீழ்த்த தயாராகிவிட்டதை உணர்த்த
செக்மேட்
என்றபோது
கைவசமிருந்த 9mm துப்பாக்கியால்
உன் நெஞ்சில் தோட்டாக்களை வெடித்தேன்..
என் மதுவில்
ஆப்பிரிக்க பாம்புகளின் விஷத்தை கலந்த உண்மையை
கக்கியபடி செத்துபோனாய்..
வாயில் நுரைதள்ளி நானும் விழ,
ஆட்ட காய்கள்
வெற்றி கும்மாளமிட்டபடி
பலகையின் அதனதன் இடத்தில் அமரதுவங்கின..
யாரோ இரண்டு பேர் விளையாட வந்தமர்ந்தனர்..

10.02.2009

--OOO--

இது இந்த தளத்தில் நூறாவது பதிவு.. ஆச்சர்யமா இருக்கு.. ஆனால் அதே நேரம் எழுதிய நூறில் எத்தனை தேறும் என்று எடுத்தால், நிற்பது கொஞ்சமே இருக்கும்.. தமிழ் தெரியும் என்பதை தவிர்த்து இந்த வலைத்தளத்தை துவங்க வேறு எந்த தகுதியும் இல்லாமலேயே எழுத ஆரம்பித்துவிட்டேன்.. அதே நேரத்தில், எதையும் எழுதலாம் என்ற இந்த இணைய சுதந்திரத்தையும் நேசிக்கிறேன்..

இதெற்கெல்லாம் முக்கிய காரணம், தமிழில் என் வாசிப்பு வெகு குறைவு.. தமிழில் எழுதப்பட்டிருக்கும் எந்த முக்கிய நூல்/எழுத்தாளர் எதையும் நான் வாசித்ததே கிடையாது.. சமீபத்திய புத்தக கண்காட்சியில் கொஞ்சம் புத்தகம் வாங்கி படிக்க துவங்கி இருக்கிறேன்.. (என்ன புத்தகங்கள் வாங்க வேண்டுமென்று கூட அய்யனாருக்கு மடல் அனுப்பி கேட்டு தெரிந்து கொண்டேன்..) ஓரளவுக்கு நல்ல பதிவுகள் எழுத முயற்சிக்கிறேன்.. :)

இப்போதெல்லாம் ஆணிகள் ரொம்ப அதிகமா இருக்கு.. அதனால் பதிவுலகம் வருவது ரொம்ப குறைந்து விட்டது.. அதே போல், இந்த தளத்தின் வருகையாளர் எண்ணிக்கையும் குறைந்துவிட்டது.. எல்லோருக்கும் ஆணி அதிகமாகிவிட்டதா? இல்லை பொருளாதார நெருக்கடி காரணமாக வேலையை தக்கவைத்துக்கொள்ளும் பயம் காரணமாக பதிவுலகம் பக்கம் யாரும் அவ்வளவாக வருவது இல்லையா? இல்லை என் எழுத்துக்கள் ரொம்ப மொக்கையா இருக்கா?

அப்பறம், உங்கள் நேரத்தில், எனக்காகவும் கொஞ்சம் நேரம் ஒதுக்கி நான் எழுதுவதையெல்லாம் சகிச்சி படிக்கிற உங்களுக்கு வார்த்தைகளால் விளக்கமுடியாத நன்றி.. நன்றி.. :)

அய்யனாரின் கவிதையொன்று...

2009-02-20T08:38:00.001+05:30

வ.வெ.தொ.அ.வெ.கு - 3

எதைக் கொண்டாவது
என்னை அழி.
துரத்தியடி.
நிராகரி.
காறியுமிழ்.
சொற்களின் வன்மம் கொண்டு
கருக்கு.
மிதி.
புதை.
மீண்டும் எழாமலென்னை
அழித்தொழி.
.................
வெறுமனே விலகாதே
.......................
உன் விலகல்
என் பைத்தியம்.

இது போலானதொரு சூழல் வாய்த்திராத போதும், ஏனென்றே தெரியவில்லை.. இந்த கவிதையின் கடைசி இரண்டு வரிகள் என்னை இரண்டு நாட்கள் ஆக்கிரமித்து கிடந்தன.. அதை பகிர்ந்து கொள்ளவே இங்கு பதிகிறேன்..

இந்த கவிதையை இங்கு பதிவதற்கு அய்யனாரிடம் அனுமதி வாங்கவில்லை.. அய்யனார், மன்னிக்க.

கடவுளை கொலை செய்ய ஆயத்தமாகுதல்..

2009-02-12T04:37:00.004+05:30

கடவுளை* கொலை செய்யவேண்டுமேன்ற
வெகுநாளைய யோசனையை
செயல்படுத்தவேண்டிய தருணம் வந்ததாக உணர்கிறேன்..
கடவுளை கொலை செய்ய
காரணங்கள் பெரிதாக இல்லையென்றாலும்
ஆர்வம் காரணமாகவே
இக்கொலை செய்ய உத்தேசித்துள்ளேன்..

ஆயத்தமாதலின் முதற்கட்டமாக
காலங்காலமாக கட்டமைக்கபட்டிருக்கும்
கடவுள் மீதான பயத்தையும்,
கொலை செய்யும் சில கணங்களுக்கு முன்பு
எழப்போகும் இரக்க உணர்வையும்,
முதன் கொலைக்கு பின்பாக எழப்போகும்
குற்ற உணர்ச்சியையும்,
ஆரம்பத்திலேயே என்னிலிருந்து பிரித்தெடுத்து
அறுபத்தியொன்பது பாலித்தீன் பைகளில் நிரப்பி புதைத்து விட்டேன்..

தேடியலைந்து
முப்பத்தியாறு சென்டிமீட்டர் நீளமுடைய
மிக அழகான கத்திகள் இரண்டும்
ஒரு மயிலிறகும் வாங்கி வைத்திருக்கிறேன்..

திட்டம் இதுதான்..
கடவுளை சந்திக்கையில்
கண்ணிமைக்கும் நேரத்தில்
நெஞ்சுக்கூடு முடியும் பள்ளத்தில் இதயத்தை நோக்கி
ஒரு கத்தி குத்தலும்,
சாவகாசமாக
வயிற்றில் ஆரம்பித்து சிறிநீரகம் வரையிலான
ஒரு குத்தி கிழித்தலும்,
பின்பாக கடவுளின் ரத்தத்தில்
சில புனைவுகளை எழுதி கடவுளை கலைத்து போடுதலும்..

12.02.2009

* கடவுள் - கடவுளர்கள்/மதங்கள்/புனிதங்கள்/அதிகாரங்கள்/வரலாறு இவற்றை குறிக்கும் குறியீடாகவும் கொள்ளலாம்.. எனவே கடவுள் நம்பிக்கை உள்ளவர்கள் என்னிடம் சண்டைக்கு வராதீர்கள்..
நான் பாவம்.. :)

1. நான் கடவுள் படம் கிளறிய உணர்வுகளும் இக்கவிதை எழுத ஒரு காரணமே..
2. பிரேம் - ரமேஷ் -இன் கொலை மற்றும் தற்கொலை பற்றி சிறு கவிதை தொகுப்பை பாதி படித்ததற்கே இப்போது எதை எழுதினாலும் கொலை வந்து சேருகிறது எழுத்தில்..
3.இன்று Charles Darwin-இன் இருநூறாவது பிறந்தநாள்..

இருபத்தி மூன்றாவது காதலர் தினம்...

2009-02-11T07:55:00.001+05:30

அர்த்தமில்லாமல்
அகால வேளையில் பொழிவதாய்
அலுத்து கொள்கிறாய்
இந்த மழையை..

உன்னிடம்
காதலை சொல்ல முடியாமல்
வார்த்தைகளை
மென்று விழுங்கிகொண்டிருக்கும்
எனக்கு

இந்த மழை
வார்த்தைகளை கோர்த்து தருகிறது
என்று சொன்னால்
நீ நம்புவாயா??

ஒரு வேளை இந்த கவிதையை நீங்கள் படித்திருக்கலாம்.. என் ஆரம்ப கால கவிதைகளுள் ஒன்று.. மனசுக்கு நெருக்கமான கவிதை..

நான் பிறந்த பின்பு வரும் இருபத்தி மூன்றாவது காதலர் தினம்.. ஆனால் இதுவரை ஒரு காதலர் தினம் கூட கொண்டாடவில்லை என்பது மிகுந்த வேதனையளிக்கிறது.. :(
எல்லாவற்றுக்கும் நான்தான் காரணம்.. ஒரு முறை கூட முழுமூச்சோடு முயற்சிக்கவில்லை.. சரி போகட்டும்.. அடுத்த வருட காதலர் தின பதிவாவது என் காதலியோடு சேர்ந்து எழுதுனும்.. அதுக்கு உங்க கிட்ட வேற என்ன கேட்க போறேன்.. வாழ்த்துக்கள் தான்.. :) (உன்னோட ஸ்டார்டிங் எல்லாம் நல்லாத்தான் இருக்கு, ஃபினிஷிங் சரி இல்லையப்பா.)

எனக்கு அய்யனாரின் எழுத்துக்கள் மீதான போதை தீருவதாக இல்லை.. அவர் சோகமா எழுதினாலும், அவர் வார்த்தைகளை ரசித்து விட்டு வருகிறேன்.. என்ன ஒரு கொடூர மனம் எனக்கு.. அவர் அனுமதி இல்லாம அவரின் சில படிமங்களை எடுத்து, ஒரு காதல் கவிதை ஒன்று எழுதி இருக்கிறேன்.. படிச்சி பார்த்து சொல்லுங்க..

குறிப்புகளை பிரதியெடுத்தல் (அ) அய்யனாரின் படிமங்களை தொடருதல்..

நாம்
காதலுக்குள் விழ துவங்கியது முதல்
ஒரு புது உலகத்தை பிரசவிக்கலானோம்..

எல்லையற்ற பெருவெளியும்
எப்போதுமான மழையும்
தனிமையின் இசையும்
வயல்வெளிகளும்
கொன்றை மரங்களும்
பவளமல்லி பூக்களும்
பூவீன்ற அடர் நிற தீற்றல் கொண்ட பறவைகளும்
தூங்கும் ஏரிகளும்
பலநிற மீன்களும்
ஆகாயத் தாமரைகளும்
வனங்களில் அலையும் நீலியும்
அடர் கானகப் புலிகளும் அவற்றின் குகைகளும்
மட்டுமேயிருக்கும்
அவ்வுலகத்தில்
நாம்
காலங்களின் எல்லையுடைத்து
பரிமாறிக்கொண்ட
முத்தங்களின் குறிப்புகளை
பின்னொரு நாளில் பிரதியெடுக்க துவங்கினோம்..

11.02.2009

அப்படியே அய்யனாரின் சில காதல் கவிதைகள் பதிவையும் படிச்சிடுங்க.

எல்லோருக்கும் இதயம் கனிந்த Advanced காதலர் தின வாழ்த்துக்கள்..
குறிப்பாக காதலித்து கொண்டிருப்பவர்களுக்கு பொறாமையோடு காதலர் தின வாழ்த்துக்கள்.. :)

வௌவால் இல்லாத கவிதை...

2009-02-06T18:22:00.008+05:30

கவிதைக்குள் எழுதிவைத்த
வௌவாலொன்று
நினைவு திரும்பிய கணம் முதல்
முதல் வார்த்தைக்கும் இறுதி வார்த்தைக்குமாய்
திரிந்து பறந்து தப்பிக்க முனைகிறது..
கவிதையை பிரித்து
வெளியேறிட உதவும் பிரக்ஞையின்றி
வன்மம் படர மௌனிக்கிறேன்..
அடுக்கிவைக்கப்பட்ட
வார்த்தைகள்
மீது
மோதி தடுமாறி
கவிதையை கலைத்து போடுகிறது;
இறுதியில்
ஒரு ஏளன புன்னைகையுடன்
கவிதையை உடைத்து வெளியேறுகிறது
அவ்வௌவால்..
கலைந்த கவிதையை
வௌவாலில்லாமல் மீண்டும் அடுக்க துவங்குகிறேன்
நான்..

05.02.2009

- உயிரோசை [09.02.2009] இணைய இதழில் பிரசுரமாயிருக்கிறது..

கிரியாஊக்கி...

2009-02-02T15:11:00.007+05:30

நாம்
பறவையின் கூடென கட்டிய காதலும்
அக்காதலை உடைத்தெறிந்த உன் பிரிவும்
அதை தொடர்ந்த உன் நினைவுகளின் வலிகளும்
ஒரு பின்னிரவு மழைநேரத்தில்
என்னிலிருந்து
தவளைகளாக உற்பத்தியாக துவங்கின..

அரை பாட்டில் விஸ்கி
உள்ளுக்குள் இத்தனை தவளைகள் உருவாகிட
கிரியாஊக்கியாய் இருந்தது
மிக பெரும் ஆச்சர்யத்தையே தந்தது..

ஒரு தவளையை
மெதுவாக கையிலெடுத்து முத்தமிட்டேன்..
"போடா பொறுக்கி" என்றபடி உன்னை போல்
இறுக்கி அணைக்காமல்
என்னை கெட்ட வார்த்தைகளால் திட்டுவிட்டு
கதவை நோக்கி துள்ளி போக ஆரம்பித்தது..

சத்தமாய் சிரித்துவிட்டு
மிச்சமிருந்த விஸ்கியையும்
அப்போதே குடித்துவிட முடிவு செய்தேன்..

27.12.2008

மிக அற்புதமான கணத்தின் நீட்சியில்...

2009-01-26T19:20:00.000+05:30

உன் நினைவுகளிடமிருந்து தப்பித்து
உன்னை
வெறுக்கவும் துவங்கிவிட்ட
ஓர் மிக அற்புதமான கணத்தின் நீட்சியில்

தன் கூட்டை உடைத்தெறிந்துவிட்டு
திசைகள் பற்றிய பிரக்ஞை ஏதுமில்லாமல்
பறக்க துவங்குகிறது
ஒரு பறவை..

வாயில் கவ்விய இரையை
துப்பிவிட்டு
பெருமலையின் ஊடே
நகர துவங்குகிறது ஒரு பாம்பு..

உனக்கு
இன்னும் கொஞ்சம் அழுத்தமான முத்தங்களையே
கொடுத்திருக்கலாமோ
என்று சிந்திக்க துவங்குகிறேன் நான்..

03.12.2008

அன்பை தொலைத்தலும், பரிணாமமும்...

2009-01-20T00:21:00.001+05:30

என்னிடமிருந்த
எல்லையற்ற அன்பை
தொலைக்க ஆரம்பித்த தருணங்களிருந்து
முளைக்க ஆரம்பித்தன
தலையில் இரு கொம்புகளும்,
முதுகுத்தண்டின் நீட்சியாக ஒரு வாலும்..

இருள் படிந்த தனிமைகளையும்,
நினைவுகளின் வலிகளையும்,
கொழகொழவென்ற‌ ரத்தத்தையும்
நேசிக்க ஆரம்பித்திருக்கிறது மனசு..

சரி தவறுகளை
பிய்த்தெறிந்த கணங்கள் முதல்
வலுவாக ஆரம்பித்தன
சுயநலம் மிக்க கோர பற்கள்..

எல்லைகளை உடைத்தெறிந்துவிட்டு
கீழான மனித நிலையிலிருந்து
ஒரு மகோன்னத மிருக நிலைக்கு
பரிணாமம் அடைந்து கொண்டிருக்கும் இந்நிலையில்
உணரமுடிகிறது..
நான் நிரம்ப மகிழ்ச்சியாயிருக்கிறேன் என்பதாக... :)

11.11.2008

பொங்கல் திருநாள் வாழ்த்துக்கள்...

2009-01-14T02:43:00.002+05:30

எல்லோருக்கும் பொங்கல் திருநாள் வாழ்த்துக்கள்.. தமிழ் புத்தாண்டு வாழ்த்துக்கள்..
தை, புது நம்பிக்கைகளையும் மகிழ்ச்சியையும் செழிப்பையும் பிரசவிக்கட்டும்..

A.R.ரஹ்மான், Golden Globe Award (Best Original Score - Slumdog Millionaire [2008]) வாங்கியிருக்கும் இந்த மகிழ்ச்சியான தருணத்தில், அவருக்கு சிறப்பு வாழ்த்துக்கள்..

என் வாழ்வில் முதன் முறையாக இந்த வருடத்தின் புத்தக கண்காட்சிக்கு செல்ல முடிந்தது.. கையில் காசு இருந்ததால்..
கடந்த சனியன்று சென்று வந்தேன்.. மகிழ்ச்சியாய் இருந்தது.. நீங்களும் இதுவரை செல்லாமல் இருந்தால் ஒருமுறை சென்று வாருங்கள்..

அப்பறம் எனக்கு ஒரு விருது கொடுத்து இருக்காங்க.. வண்ணத்து பூச்சி விருது..
கொடுத்தவர்கள் தோழி மது, அன்புடன் அருணா அக்கா மற்றும் அண்ணன் தாமிரா.. உங்கள் அன்பிற்கு மிக்க நன்றி..

எனக்கு தெரிந்த வரை அத்தனை பேரும் இந்த வண்ணத்து பூச்சி விருது வாங்கிவிட்ட நிலையில் யாருக்கு கொடுக்கலாம்ன்னு நெனைச்சப்போ, ரெண்டு பேரு சிக்கினாங்க..
அவங்க யாருன்னா gayathri மற்றும் நாணல்.. (எல்லோரும் கை தட்டுங்க..)

விதிமுறைக‌ள் மிக‌ எளிமையான‌வை. நாம் ர‌சிக்கும் ப‌திவ‌ர்க‌ளுக்கு ப‌கிர‌வேண்டும். விருதை வ‌லைப்பூவில் இட‌வேண்டும். கொடுத்த‌வ‌ர், கொடுக்க‌ப்ப‌டுப‌வ‌ர் அனைவ‌ருக்கும் இணைப்புக‌ள் த‌ர‌வேண்டும். பின்னூட்ட‌ அறிவிப்புகள் செய்ய‌ வேண்டும்.

இதோடு "எஸ்" ஆகிக்கறேன்.. bfn

14.01.2008

அன்பை தொலைத்தலும், ஒரு நிகழ்வும்...

2009-01-06T04:40:00.000+05:30

ஒரு வெறுப்பான தினத்தின் முடிவில்
என்னிடமிருந்த
எல்லையற்ற அன்பை
மலையுச்சியிலிருந்து தூக்கி எறிந்தேன்...

பொத்தென்று
விழுந்து சாகாமல்
பள்ளத்தாக்குகளில் மெல்ல மெல்ல
எதிரொலித்து வீழ்ந்ததை
கொடூர புன்சிரிப்போடு ரசித்துவிட்டு

வீடு
திரும்பிய போதுதான்
திறந்து கிடந்த கதவின் பின்மறைவில்
அப்பெரும் உருவை கண்டேன்..

பயத்தில் செய்வதறியாது
எங்கெங்கோ அலைந்து திரிந்து
குற்றுயிராய் எதிர்பட்ட
என் எல்லையற்ற அன்போடு
வீடு திரும்பிய போது
அப்பெரும் உருவத்தை காணவில்லை...

21.10.2008

நான் இதை சொல்லியே ஆகணும்.. 2008 அவ்ளோ அட்டகாசம்..

2009-01-01T17:16:00.004+05:30

2008

தொடர்ந்து வாழ்க்கையை நகர்த்துவதற்கான எவ்வித சாத்தியகூறுகளும் இல்லாமல் வெறுமை சூழ கிடந்தேன்.. இது 2007 இறுதி மற்றும் 2008 துவக்கம். இப்படியாகத்தான் துவங்கியது 2008.

இருபத்தி இரண்டு வருடங்களில் இந்த வருடத்தை நிச்சயம் மறக்க முடியாது.. இந்த வருடத்தில் தெரிந்து கொண்டது, புரிந்து கொண்டது மிக அதிகம்.. வருத்தப்பட்டது மிக அதிகம்.. சிரித்தது மிக அதிகம்.. சிலாகித்தது மிக அதிகம்.. பார்த்த திரைப்படங்கள் மிக மிக மிக அதிகம்.. விளையாடியது அதிகம்.. ஏற்காடு, ஒகேனக்கல், கூர்க், பிரம்மகிரி காடு என்று சுற்றியது மிக அற்புதம்.. பிளாக் எழுத ஆரம்பித்ததும் இந்த வருடம்.. பிளாக் மூலம் பலவித எழுத்துக்களை படிக்க முடிந்ததும், பலரின் எழுத்து கண்டு பொறாமை பட்டதும் மிக அதிகம்.. கவிதை என்ற பெயரில் ஒரு வருடம் எழுதி இருப்பது அதிசயம்.. பல நண்பர்கள் பிளாக் மூலம் அறிமுகம் ஆனதும் இவ்வருடத்தில்தான்..

அலுவலகத்தை பொறுத்தவரை இவ்வருடத்தின் மிகுந்த நாட்களெல்லாம் இரவு நேர பணியிலே மட்டும் இருந்தேன் முதன் முறையாக.. நேற்றைய இரவு வரை.. ஆனால் அதே நேரத்தில் இரவுநேர பணி காரணமாக கண்ணார பெண்களை காணவே முடிவதே இல்லை.. (சைட் அடிக்கவில்லை என்பதை இப்படியும் சொல்லலாம்..) அலுவலக மொட்டை மாடியில் இரவில் நண்பர்களோடு காஃபியோடு கலங்கரை விளக்கின் சுழல் ஒளியோடு கடற்கரையின் மெல்லிய சத்தத்தோடு சிரித்து கதை பேசியதும் புது அனுபவம்.. இப்போது இந்த பனிக்காலத்தில் இன்னும் அழகாக இருக்கிறது மேற்சொன்ன நிகழ்வு.. அலுவலக குழுவில் சேர்ந்த நால்வரை தவிர வேறு எந்த புதுமனிதரையும் சந்திக்கவே இல்லை இவ்வருடத்தில்.. மிகுந்த பணிச்சுமை இருந்த ஒரு மாதத்தில் கிடைத்த நேரமெல்லாம் அய்யனாரின் அத்தனை பதிவுகளையும் படித்து போதைகொண்டதும் இவ்வருடத்தில்தான்.. அதே போல் வீணாபோனவன் கவிதைகளையும்..

Kevin Spacey-இன் நடிப்பும், தாம் தூம் படத்தின் "அன்பே அன்பே" பாடலும் மிகுந்த நேசத்திற்குரியதாய் இருந்தது.. கடந்த வார இறுதியில் பார்த்த Ratatouille[2007] அனிமேஷன் திரைப்படமும், Pulp Fiction[1994] திரைப்படமும் மிகுந்த அலாதியான இன்பத்தை கொடுத்தது..

இந்த தளத்தில் இணைப்பு கொடுத்திருக்கும் அத்தனை நண்பர்களின் எழுத்துக்களையும் நான் மிக மிக மிக மிக நேசிக்கிறேன்.. நீங்கள் இவ்வருடம் முழுதும் என்னை ஆக்கிரமித்து இருந்தீர்கள்.. I Love You All.. உங்களை நான் தொடர்கிறேன்.. என்னை தொடரும் அத்தனை நண்பர்களுக்கும் மிக்க நன்றி..

இன்னும் சில பேரின் எழுத்துகளுக்கும் இணைப்பு கொடுக்க வேண்டி இருக்கிறது.. இப்போதைய மிகுந்த பணிச்சுமை காரணமாக பல புதிய பதிவர்களின் பதிவுகளை படிக்க முடியாமல் இருக்கிறது..

இவ்வருடத்தின் 365 நாட்களும் சம்பவங்களால் நிரம்பி இருந்திக்கிறது..எனவே முழுமையாக ஒரு வருடம் முழுதும் வாழ்ந்த மனநிறைவை தருகிறது..அத்தனையும் திரும்பி பார்க்கும் போது மிக அழகாக இருக்கிறது..

[எப்படியோ சுருக்கமா சொல்லிட்டேன்..]

2009

இந்த புதிய வருடத்தை பல புது நம்பிக்கைகளோடு எதிர்நோக்குகிறேன்.. எல்லாம் சாத்தியப்படும் என்று நம்புகிறேன்.. எல்லாம் சாத்தியப்படும் போது, பிளாக் மூலம் அறிமுகமான நண்பர்களோடு நேரில் சந்தித்து பழகலாம் என்று நினைக்கிறேன்.. பார்க்கலாம் எவ்வளவு தூரம் சாத்தியமாகிறது என்று.. :)

என்னை போல நீங்களும் பல கனவுகளோடு இருப்பீர்கள்.. உங்கள் எண்ணங்களும் கனவுகளும் நிறைவேறட்டும்..
இனிய புத்தாண்டு வாழ்த்துக்கள்.

01.01.2009

குட் நைட்... (உயிரோசை கவிதை)

2008-12-22T22:39:00.003+05:30

இதை
ஒரு நிதானமற்ற பொழுதின்
கை நடுக்கங்களுக்கிடையே
இலக்கில்லாமல் கிறுக்க ஆரம்பித்திருக்கிறேன்..

சத்தமில்லாமல்
புகைந்து கொண்டிருக்கிறது
இந்த ஆழ்ந்த பனி இரவின்
தெரு விளக்கு வெளிச்சம்..

இறந்த காலத்தின் வலிகளிலொன்று
மூளையின் எங்கோ ஓர் மூலையில்
உயிர்பெற்று
நெஞ்சத்தினூடே வழிந்து

பின் வார்த்தைகளாய்
உருமாற தெரியாமல் உதிர்கிறது..
இதோடு
இந்த கிறுக்கலும் நின்று போகிறது..

நாளைய இரவிலும்
என் உளறலை தொடர கூடும் என்ற அவசியமற்ற தகவலோடு
இப்போது வலுக்கட்டயாமாய்
தூக்கத்தை போர்த்திகொள்ள போகிறேன்..

குட் நைட்..

23.09.2008

- உயிரோசை [22.12.2008] இணைய இதழில் பிரசுரமாயிருக்கிறது..

சில மாதங்களாகவே உயிரோசை மெயில் ஐடி எல்லாம் கொடுத்து அனுப்பு அனுப்பு என்று சொல்லி கொண்டிருந்த பிரேம் அண்ணாவுக்கு இவ்வேளையில் அளவில்லா அன்பும் நன்றியும்...

உருமாற்றம்...

2008-12-19T03:08:00.005+05:30

உன்னை
நேசிக்க துவங்கிய கணத்திலிருந்து
பொழிய ஆரம்பிக்கிறது
ஒரு
பெருமழை!

தவளையாய் உருமாறி கத்த துவங்குகிறேன்
நான்..

19.12.2008

உன்னை
நேசிக்க துவங்கிய கணத்திலிருந்து
பொழிய ஆரம்பிக்கிறது
ஒரு
பெருமழை!

கவிதையாய்
துளிர்விடுகிறது
என்னுள் உன் எண்ணங்கள்..

-ஸ்ரீமதி
21.12.2008

தவறி விழுதலும், சிதறல்களும்... (making things complicated)

2008-12-12T04:37:00.001+05:30

எல்லாமே தவறுகிறது..
தவறி
வி
ழு
ந்
து
சி தறு கி ற து..

எவ்வளவுதூரம் பத்திரப்படுத்தியும்
எப்படியெல்லாமோ பாதுகாத்தும்
ஒரு நொடிப்பொழுதில் எல்லாமும் விழுந்து
நொறுங்கி போகிறது..

எனக்கு மட்டும்
இப்படியெல்லாம் நிகழ்ந்து தொலைப்பதின்
காரணம் புரிவதே இல்லை.

கோபங்களும், எரிச்சல்களும், பொறாமைகளும்
மூளைக்குள் பொங்கி பெருகும் நேரங்களில்
என்னை கட்டுப்படுத்திகொள்வது
மிகவும் கடினமாயிருக்கிறது..

இசை கேட்கிறேன்..
இருக்கும் சில நண்பர்களிடம் வலிந்து பேசி சிரிக்கிறேன்..
புது மனிதர்களையும்
புது சூழல்களையும் தவிர்த்து
முடிந்தவரை என் உலகத்தை சுருக்கி கொள்கிறேன்..
கவிதைகளாய் தேடி படித்தும் திரைப்படங்களாய் பார்த்தும்
என் வன்மங்களை நீர்த்து போக முயற்சிக்கிறேன்..

நேர்மறையான
எண்ணங்களை உருவாக்கியும்
கற்பனை செய்தும்
என் நம்பிக்கைகளை நிரப்பி கொள்கிறேன்..

எனினும்
உள்ளிருக்கும் மிருகமோ
மிக அமைதியாய் சிரிக்கிறது..
எனக்கு மிகவும் பயமாயிருக்கிறது...

12.12.2008

குறிப்புகளைத் திணித்தல்...

2008-12-05T07:14:00.005+05:30

வலுக்கட்டாயமாய்
ஒரு கவிதை எழுதிட தீர்மானித்து,

தூக்கம் கெடும் என்று தெரிந்தும்
இந்த அகால இரவில்
உன்னை நினைத்து கொள்கிறேன்..
உன் நினைவின் வலி பிடிக்காமல்
உனக்கு முந்தைய காதலியை நினைக்க ஆரம்பிக்கிறேன்..

இரவை அணைத்து
மழையை நேசித்து நனைகிறேன்..
கடுங்குளிர் மழைத்துளி வழி உடம்பை
ஊடுருவுகையில் வெறித்தனமாய்
உன் தோழியின் பெயரை ஊளையிடுகிறேன்..

உனக்கு கொடுத்ததை விட
அதிகமான முத்தங்களை
இனி வரபோகிறவளுக்கு கொடுக்க வேண்டும் என்று
மேலும் ஒரு குறிப்பை மனதில் திணித்து கொள்கிறேன்..

"தோட்டத்து நாகலிங்கப்பூக்கள்
பின்னிரவு மழையில் கரைந்து
எழுப்பும் வாசம்"
என்று துவங்கும் அய்யனாரின் கவிதையையும்
Just Like Heaven-ன் கடைசி காட்சியையும்
ஒரே நூலில் ஊசலாடும்படி
மனசுக்குள் இருத்தி கொள்கிறேன்..

மழையில்
படுத்தபடி நனைய வேண்டுமென்ற
வெகுநாளைய
ஆசையையும் இப்போது தீர்த்து கொள்கிறேன்..

ஊர்
அதிர
பெரும்
இடியொன்று
மின்னலை துரத்தி ஓடுகிறது..

05.12.2008

தன்னிலை விளக்கமும், ஒரு அழகான காதல் கதையும்...

2008-11-23T17:31:00.009+05:30

முன்குறிப்பாய் ஒரு தன்னிலை விளக்கம் : எனக்கும் பொண்ணுங்களுக்குமான தூரம் இன்றுவரை ஒரு தொடுவான தூரமாகவே இருந்துவருகிறது.. அவ்வப்போது இதற்கு உள்நாட்டு சதி கூட காரணமாக இருக்குமோ என்று சந்தேகப்பட வேண்டியிருக்கிறது.. அதே நேரத்தில், பார்க்கும் பெண்களையெல்லாம் ஒரு தலையாய் காதலித்து தொலைக்கும் பாழும் மனசு வேறு.. இந்த நேரத்தில், வலையுலகத்தில், நிறைய பேர் எழுதும் காதல் கதைகளை படிக்கும் போது கொஞ்சம் சந்தோஷமாகவும், பொறாமையாகவும் இருக்கும்.. அதே நேரத்தில் ஒரு பெருங்கோபமும் வந்து தொலைக்கும். நான் படித்த எந்த காதல் கதையிலும் நாயகன் பெயர் "சரவணா" என்று இருப்பதில்லை.. ஏன் "சரவணா" என்று பெயர் இருப்பவர்களுக்கு காதல் வராதா?? எந்த பெண்ணும் "சரவணா" என்ற பெயர் கொண்டவர்களை காதலிக்க மாட்டார்களா?? இந்த பெருங்கோபம் காரணமாக.. நானே ஒரு காதல் கதை எழுத தீர்மானித்துவிட்டேன்.. [முடிவு பண்ணியாச்சி..] இந்த காதல் கதையின் நாயகன் பெயர் "சரவணா".. [கதையை படிச்சிட்டு இந்த கதை உங்க சொந்த கதையா என்றெல்லாம் கேட்க கூடாது என்பதற்காகவே இந்த தன்னிலை விளக்கம்..]

இனி கதை..

நெஞ்சுக்குள் பெய்திடும் மாமழை..
[தலைப்பு டைமிங்கா இருக்குல்ல..]

சரவணா.. ரொம்ப நல்லவன்.. வல்லவன்.. திறமையானவன்.. அன்பானவன்.. [சரி.. சரி.. பொறாமைபடாதீங்க.. இதோட நிறுத்திக்கிறேன்.. ] இதற்கு முன்னர் வேலைசெய்து கொண்டிருந்த ஒரு சிறு பொட்டிதட்டும் கம்பெனியில் பேப்பர் போட்டுவிட்டு கடந்த திங்களன்றுதான் இந்த பெரிய பொட்டிதட்டும் கம்பெனியில் சேர்ந்திருந்தான்.. கடந்த இரு நாட்களாக இதே கம்பெனியின் வேறு ஒரு அலுவலகத்தில் இன்டக்ஷன் ப்ரோக்ராம் முடித்துவிட்டு இன்றுதான் தன் இனி வேலை பார்க்க போகும் இந்த அலுவலகத்திற்கு வருகிறான்..

"மச்சி.. முதல் நாளே எந்த வால்தனமும் பண்ணிடாதே" என்று மனதிற்குள் சொல்லியபடியே உள்ளே நுழைந்தான்.. சம்பிரதாய பேச்சிகளுக்கு பின், தன் டீம்மேட்ஸ் இடம் அறிமுகம் செய்து கொள்கையில்தான் அந்த அழகுதேவதையை கண்டான்.. மொத்த பிரபஞ்சமும் அவன் மூளைக்குள்ளும் இதயத்துக்குள்ளும் வெடித்து சிதறியது.. பெருமேகங்கள் சூழ்ந்து ஒரு மாமழையே அவனுக்குள் பொழிந்தது..

[நாயகிக்கு என்ன பெயர் வைக்கலாம்??!! நாமளும் "A" என்ற எழுத்தில் ஆரம்பிக்கும் ஒரு பெயரையே வைப்போமே..ம்ம்ம்ம்.. அனிதா.. அட..ரொம்ப நல்லா இருக்கே இந்த பேரு..
அனிதா என்ற பெயர் இருக்கும் யாரும் இந்த கதையை படிக்கும் பட்சத்தில், சண்டைக்கு வர வேண்டாமென்று கேட்டு கொள்கிறேன்..]

"ஹாய் அயம் அனிதா" என்றாள் அந்த அழகுதேவதை..

ஆனால் அவன் மனதுக்குள்ளோ.. "கடவுளே.. இவ்ளோ அழகா ஒரு பொண்ண படைக்க முடியுமா.. ஒத்துக்கறேன்.. நீ பெரிய ஆளுதான்.."

ஆனால் அவனுடைய வழக்கமான பயம் அவனை தொற்றி கொண்டது.. இந்த பெண் வேறு யாரையாவது காதலித்து கொண்டிருந்தால்..

அவசர அவசரமாய் ஒரு வேண்டுதலை போட்டு கொண்டான் மனதில்.. "கடவுளே, இவள் வேறு யாரையும் காதிலித்து கொண்டிருக்க கூடாது.. அப்படியே எவனேனும் இருந்தால், கண்மூடித்தனமாக ஓடும் எத்தனயோ லாரிகளில் ஒன்றில் மட்டுமாவது அவனை சிக்க வைத்து அவனை உன்னிடமே எடுத்துகொள்.."

"மச்சி..உனக்கு கடவுள் நம்பிக்கையே கிடையாதே.. இப்போ என்ன பொண்ண பார்த்ததும் திடீர் கடவுள் நம்பிக்கை.. இதற்காகவே கடவுள் உனக்கு கண்டிப்பா ஹெல்ப் பண்ண மாட்டார் மச்சி.." என்றது அவனுக்குள் இருந்த மனசாட்சி..

"கடவுள் உதவி செய்யலைனா என்ன.. நானே அப்படி ஒருவன் இருக்கும் பட்சத்தில் தேடி பிடித்து கொல்வேன்.." என்றான் மனசாட்சியிடம்..

இப்படி ஒரு நல்லவனை பதினைந்து நொடிகளில் கொலைகாரனாய் மாற்றி கொண்டிருந்தது அந்த அழகு பிசாசின் கண்கள்..

ஒருவழியாய் அறிமுகத்தை முடித்துகொண்டுவிட்டு தன் கியூபிக்கில் வந்து அமர்ந்தான்.. நெஞ்சுக்குள் வேகமாய் காதல் ரயில் ஓட ஆரம்பித்திருந்தது..

"எப்படியாவது உடனே ப்ரபோஸ் பண்ணிடனும்.. என் மனசில இருக்கிறது சொல்லிடலாம்.. அவளுக்கும் காதல் வரும் போது பதில் சொல்லட்டும்.. முதலில் ஒரு அட்மிஷனை போட்டு வைப்போமே.." என்று மனசுக்குள் முனகினான்..

"அவ்ளோ தைரியசாலியா மச்சி நீ.." என்று எக்காளமிட்டது அவன் மனசு..

சரவணா அதை கொஞ்சமும் பொருட்படுத்தாமல் அனிதாவிடம் எப்படி ப்ரொபோஸ் பண்ணலாம் என்று யோசித்து கொண்டிருந்தான்.. அதே நேரம் அவனுடைய வழக்கமான பயம் அவனை சூழ்ந்து கொண்டது.. அவன் இது வரை நிறைய பெண்களை ஒரு தலையாய் காதலித்து இருக்கிறான்.. இதுவரை யாரிடமும் ப்ரொபோஸ் செய்ததில்லை.. அவன் ஒரு தலையாய் காதலித்து கொண்டிருக்கும் போதே அந்த பெண்ணுக்கு வேறு எந்த பையனுடனாவது இருதலை காதல் முளைத்து விடும்.. அப்படி ஒரு ராசி அவனுக்கு..

அதே நேரத்தில் இதுவரை பார்த்த பெண்களாகவும், காதலித்த பெண்களாகவும் இல்லை இவள்.. இவள் வேறு.. முதன் முதலாக பெண் என்ற எண்ணத்தையும் தாண்டி ஒரு தேவதை என்று அவனுக்குள் உணர செய்ததால் அவனுக்குள் இத்தனை பரவசம்.. இத்தனை அவசரம்..

தமிழ் சினிமாவின் அதனை லவ் ப்ரோபோசல் காட்சிகளும் அவன் மனதில் ஓடியது..

"நீ அழகா இருக்கேன்னு நினைக்கில.. நான் ஒன்ன லவ் பண்ணல.. ஆனா இதெல்லாம் நடந்திருமொன்னு பயமா இருக்கு.." இது எப்படி இருக்கு என்றான் அவன் மனசாட்சியிடம்..

அது கேவலமாக இவனை முறைத்து கொண்டிருந்தது..

"சரி.. சரி.. வேற எதையாவது ட்ரை பண்றேன்.." என்றான்.. அப்போதுதான் அந்த கணத்தில்தான் அந்த அழகான ஐடியா அவனுக்குள் உதித்தது..

தொடரும்.. அல்லது முற்றும்.

பின்குறிப்பு : என்ன பார்க்கறீங்க.. ஏதோ ஒரு ஆர்வத்தில, ஆதங்கத்தில, ஏக்கத்தில.. எழுத ஆரம்பிச்சிட்டேன்.. ஆனா எனக்கு கதையெல்லாம் எழுத வராது.. அதனால இந்த கதை ரொம்ப ரொம்ப ரொம்ப ரொம்ப ரொமாண்டிக்கா, க்கியூட்டான உரையாடல்களோடு, அழகான கவிதைகளோடு நகர்ந்து சென்று, கடைசியில் சரவணாவும், அனிதாவும் லவ் பண்ணி சந்தோஷமா இருக்காங்க என்று நீங்களே கற்பனை செய்து கொள்ளவும்.. ஒரு வேளை எனக்கும் ஏதாவது ஒரு ஐடியா கெடைச்சா இந்த கதை கண்டினியூ பண்றேன்.. ஓகே..

பின்குறிப்பு 2 : இந்த கதை எழுத மிகவும் ஊக்கம் தந்த ஸ்ரீமதிக்கு அன்பும் நன்றியும்..

பின்குறிப்பு 3 : பின்னூட்டத்தில் இருக்கும் ரவிஷ்னா'வின் கதை தொடர்ச்சியையும் படித்து கொள்ளவும்..

23.11.2008

நிரம்பி வழிகிறது மனசு...

2008-11-16T21:41:00.002+05:30

நினைவு தப்பிய
ஆழ்மன குரல்களின்
காட்டுகூச்சல்கள் இல்லாத இக்கணத்தில்
தேவைப்படாத மொழி

வார்த்தைகளுக்குள் அமிழ்ந்து
ஒரு அடர்த்தியான மௌன பிழம்பில்
எழுத்துக்களாய் சிதைந்து போனதில்
நிரம்பி வழிகிறது மனசு.

காரணங்கள் ஏதுமில்லை.
யார் மீதும்
எந்த கோபமும் வருத்தமும் இல்லை..
வலிகள் மறந்தோ மரத்தோ போய்விட்டது..
ஓர் உற்சாகம் மட்டும்
மூளைக்குள் விம்மி விம்மி சுரக்கிறது..

கண்களை மூடி
கற்பனை செய்து பாருங்கள்..

இல்லையேல்
ஒரு பனிமிகு இரவின்
யாருமில்லா வீதியில் நடக்கும் போது
நீங்கள் இதை போல் உணரலாம்...

23.08.2008

மிகச்சரியாக...

2008-10-23T07:10:00.002+05:30

எவ்வளவு அழகாக
உன்னால் காதலிக்க முடிந்ததோ
அவ்வளவு கொடூரமாக
அக்காதலை முறித்துக் கொள்ளவும் முடிந்திருக்கிற
உன் மனசின் தன்மையை
எண்ணி வியக்கிறேன் வலிகளோடு..

படித்த கதைகளில்
பிசாசுகளுக்கு கூட இத்தகைய கொடூர மனம்
இருந்ததாய் படித்திருக்கவில்லை..

உன்னையும்,
உன் காதலையும்,
பிரிவுக்கு பின்பு என்னுள் படர ஆரம்பித்துவிட்ட
உன் நினைவுகளின் பேய்கரங்களுக்குள் சிக்கி
சிதறுண்டு கொண்டிருக்கும்
என்னையும்

காப்பாற்றிக்கொள்ளவியலாத
இயலாமையின்
ஆற்றாமை

கழிவிரக்கத்தையும்
தற்கொலை உணர்வையும்
ஒரு சேர தரும் இத்தருணத்தில்
என் சிறு அறையின் இருள்ந்த மூளைக்குள்
கால்களை கட்டி கொண்டு அமர்ந்திருக்கிறேன்..

சற்று முன்னதாக
ஒரு கூரிய பிளேடால்
அறுத்துக்கொண்ட கையிலிருந்து வரும் ரத்தம்
இப்போதைக்கு நிற்பதாக இல்லை..
மிகச்சரியாக நரம்பை அறுத்திருக்கிறேன்... :))

23.10.2008

மிக சுலபமான ஒரு தொடர்பதிவு...

2008-10-22T01:52:00.006+05:30

இந்த தொடர்பதிவை எனக்கு மிகவும் பிடிச்சிருக்கு.. ஏனென்றால் மிக சுலபமான ஒரு தொடர்பதிவு..

என்னோட Desktop Screenshot -ஐ பதிவில் போட்டால் போதும்.. இதுதான் டார்கெட்..

இந்த தொடர்பதிவுக்கு என்னை அழைத்தது தோழி "அச்சச்சோ" ஸ்ரீமதி.. நன்றி Sri..

இதுதான் என்னோட இப்போதைய Desktop.. ஒரு நாளைக்கு பத்து தடவை Wallpaper மாத்துவேன்.. Task Bar இடம் மாற்றி வைப்பேன்.. Icons இடம் மாற்றி வைப்பேன்.. இப்படி ஒரு பழக்கம் எனக்கு.. :))

இந்த தொடர்பதிவுக்கு நான் அழைக்கும் நண்பர்கள்..

அண்ணன் நிஜமா நல்லவர்..
அன்புடன் அருணா அக்கா..
பதிவு பக்கமே வராமல் இருக்கும் மது..

Desktop Screenshot எடுத்து போடுங்கப்பா.. இந்த தொடர்பதிவிற்காக..

22.10.2008

தமிழ்மணத்தில் இந்த வாரம் - சினிமா தொடர்பதிவு வாரம்..

2008-10-18T03:57:00.009+05:30

இந்த வாரம் முழுதும் இந்த தொடர் பதிவின் ஆதிக்கமே.. என்னை இந்த தொடர்பதிவுக்கு அழைத்த ஜி மற்றும் இவனுக்கு நன்றிகள்..

1. எந்த வயதில் சினிமா பார்க்க ஆரம்பித்தீர்கள்? நினைவுதெரிந்து கண்ட முதல் சினிமா? என்ன உணர்ந்தீர்கள்?

ஞாபகமே இல்லை.. நம்ம சூப்பர் ஸ்டாரின் தளபதி படத்தை குடும்பத்தோடு பார்த்த ஞாபகம்.. என் முதல் சினிமா ஞாபகமும் அதுதான்.. என்ன உணர்ந்தேன் என்பதும் ஞாபகம் இல்லை..

2. கடைசியாக அரங்கில் அமர்ந்து பார்த்த தமிழ் சினிமா?

காதலில் விழுந்தேன்.. நகுல் நல்லா பண்ணி இருக்காரு.. வாய்ப்பு கிடைத்தால் கொஞ்சம் வளரலாம்.. படம் அந்த அளவுக்கு நல்லா இல்லை என்பது என் கருத்து..

3. கடைசியாக அரங்கிலன்றிப் பார்த்த தமிழ் சினிமா எது, எங்கே, என்ன உணர்ந்தீர்கள்?

தமிழ் திரைபடத்தை அரங்கிலல்லாமல் கணினியிலோ அல்லது டி.வி-யிலோ பார்ப்பது கிடையாது.. அதுவும் டி.வி-யில் திரைப்படம் என்றால் கொடுமை.. விளம்பர இடைவேளை.. எனக்கு சுத்தமா பிடிக்காது.. சினிமா பார்க்கும் உணர்வே இருக்காது.. அப்படி இருந்தும் டி.வி.யில் கடைசியாய் பார்த்த திரைப்படம் நம்ம "தல"யின் காதல் மன்னன்.. எனக்கு மிகவும் பிடித்த படமது.. "திலோத்தமா" என்னவோ தெரியல இந்த பெயர் எனக்கு ரொம்ப புடிச்சி போச்சி..

4. மிகவும் தாக்கிய தமிழ்ச்சினிமா?

இந்த கேள்வியை படித்ததும் நான்கு தமிழ் திரைப்படங்கள் சட்டென்று நினைவுக்குள் வந்தது..

அன்பே சிவம்.. இதுதாங்க திரைப்படம்.. பலவிதங்களில் பாதித்த படம்.. "யாருனே தெரியாத பையனுக்காக அழுவுற அந்த மனசு.." "ஒருத்தனை வெட்டனும்னு வந்துட்டு, அருவாளை கீழ போட்டுட்டு மன்னிப்பு கேட்கிற மனசு.." "ஆனா ஆண்டவன் அண்ணன ஒண்ணும் பண்ணல பாத்தீங்களா.." மனச விட்டு இன்னும் போகல இந்த படம்..

7Gரெயின்போ காலனி.. படம் பார்த்துவிட்டு கிட்டத்தட்ட ஒரு வாரம் நான் யார்கிட்டயும் ஒழுங்கா கூட பேசல.. [இப்போவும் யாருகிட்டயும் நான் அவ்வளவாக பேசுவது கிடையாது..] ரொம்ப பாதித்து விட்டது..

முகம்.. நாசர் நடித்து வந்த ஒரு திரைப்படம்.. நீங்களும் பாருங்கள்.. பார்க்கவில்லை என்றால்.. அருமையான திரைப்படம்..

பேசும்படம்.. நம்ம உலக நாயகன் நடித்த திரைப்படம்.. ஒரு சின்ன டயலாக் கூட கிடையாது.. ஹிந்தி படத்தின் தழுவல் என்று கேள்விபட்டேன்.. படத்தின் முடிவு சொல்லும், அவ்ளோ தான்பா வாழ்க்கை என்று...படம் பார்த்த பின் யார்கிட்டயும் பேசவே தோணாது.. அந்த அமைதியை நீங்க நேசிக்க ஆரம்பிச்சிடுவீங்க..

5-அ. உங்களை மிகவும் தாக்கிய தமிழ்ச்சினிமா-அரசியல் சம்பவம்?

எப்போதும் நம்ம உலக நாயகன் கமல் படங்கள் பற்றி ஏதாவது ஒரு சர்ச்சையை கிளப்புவது.. அரசியலாக்குவது.. சினிமாவ சினிமாவா மட்டும் பாருங்கப்பா குறைந்த பட்சம்.. அதை அரசியலாக்காதீங்க..

5-ஆ. உங்களை மிகவும் தாக்கிய தமிழ்ச்சினிமா - தொழில்நுட்ப சம்பவம்?

நெறையவே இருக்கு.. சமீபத்ய அஞ்சாதே திரைபடத்தின் கேமரா உத்தி ஒரு உதாரணம்...

6. தமி்ழ் சினிமா பற்றி வாசிப்பதுண்டா?

நிச்சயம்.. :)) நெறைய சினி தளங்களை உலாவுவது உண்டு நேரம் கிடைக்கும் போது..

7.தமிழ்ச்சினிமா இசை?

A.R.ரஹ்மானின் பாடல்கள் மிகவும் பிடிக்கும்..
ஆனால் ஒரு காலகட்டதில் பிடித்து போகும் ஒரு பாட்டை மட்டுமே திரும்ப திரும்ப கேட்பேன்.. அது அந்த சூழலை தனக்குள் ஈர்த்து கொள்ளும்..பின் வேறொரு காலத்தில் எப்போதாவது அப்பாடலை கேட்கும் போது அந்த காலகட்டத்தை நினைவுபடுத்தி தரும் வெகு பசுமையாய்.. இப்போது எப்போதுமாய் கேட்டுகொண்டிருக்கும் பாடல் "காதலில் விழுந்தேன்" படத்தின் "சொல்லடி" பாடல். என் ரிங்டோன் கூட இந்த பாடல்தான்.. :))

8. தமிழ் தவிர வேறு இந்திய, உலக மொழி சினிமா பார்ப்பதுண்டா? அதிகம் தாக்கிய படங்கள்?

நிறைய பார்ப்பதுண்டு. இந்திய சினிமா இல்லை.. ஏனென்றால் தமிழ் தவிர வேறு எந்த இந்திய மொழியும் எனக்கு தெரியாது..[அப்போ உலக மொழியெல்லாம் உனக்கு தெரியுமான்னு கேட்க கூடாது]

அதிகம் அதிகம் அதிகம் அதிகம் அதிகம் அதிகம் பாதித்த திரைப்படம்.. அழ வைத்த திரைப்படம்.. இத்தாலிய திரைப்படமான Life is Beautiful..

இதை தவிர்த்து நிறைய பிடித்த திரைப்படங்கள் உண்டு.. ரொம்ப பிடித்த திரைப்படம் The Count of Monte Cristo.

இன்னும் சில.. One flew over the cuckoo's Nest, A Beautiful Mind, Crash, Pursuit of HappYness, 50 first dates, Derailed, Just like heaven, Finding Nemo, SAW 1,2,3,4..மற்றும் நிறைய காமெடி திரைப்படங்கள்.. போதும் இதோட நிறுத்திக்குவோம்.. பிடித்த உலக திரைப்படங்கள் பற்றி ஒரு தனி பதிவே போடலாம்..

இன்னும் காணகிடைக்காமல், காண விரும்பும் படம் Bicycle Theif..

9. தமிழ்ச்சினிமா உலகுடன் நேரடித்தொடர்பு உண்டா? என்ன செய்தீர்கள்?
பிடித்ததா? அதை மீண்டும் செய்வீர்களா? தமிழ்ச்சினிமா மேம்பட அது உதவுமா?

எனக்கு தெரிந்த அண்ணா ஒருவர், உதவி இயக்குனராக ஏழு வருடங்கள் மிகவும் கஷ்டப்பட்டும், இறுதியில் ஒரு வாய்ப்பும் கிடைக்காமல் வேறு வேலை தேடி சென்றார்..மற்ற கேள்விகெல்லாம் இல்லை என்பதே பதில்.

10. தமிழ்ச்சினிமாவின் எதிர்காலம் பற்றி என்ன நினைக்கிறீர்கள்?

செல்வராகவன், மிஷ்கின்.. போல இன்னும் சிலர் வந்தால் நல்ல எதிர்காலம் உண்டு..

11. அடுத்த ஓராண்டு தமிழில் சினிமா கிடையாது, மற்றும் சினிமா பற்றிய சமாச்சாரங்கள், செய்திகள் எதுவுமே பத்திரிகைகள், தொலைக்காட்சி, இணையம் உள்ளிட்ட ஊடகங்களில் கிடையாது என்று வைத்துக்கொள்வோம்? உங்களுக்கு எப்படியிருக்கும்? தமிழர்களுக்கு என்ன ஆகும் என்று நினைக்கிறீர்கள்?

எனக்கு ரொம்ப கஷ்டமாயிடும்.. நம்ம ஆளுங்க சினிமா மாயையிலிருந்து விடுபட ஒரு நல்ல வாய்ப்பு..

அப்பாடா.. ஒரு வழியா முடிச்சாச்சி..

நான் அழைக்க விரும்பும் ஐந்து பேர் [முறைக்காதீங்க.. அடுத்த ஒரு தொடர்பதிவுல நீங்க என்ன தாரளமா மாட்டி விடலாம்... இந்த டீல் ஓகே வா??]

1. அலுவகத்தில் பிளாகை பிளாக் பண்ணியதால் பதிவு பக்கமே வராமல் இருக்கும் பிரேம்..
2. 3rd Year-ல் மும்முரமாக இருக்கும் திவ்யப்ரியா..
3. கவிதை அண்ணன் அனுஜன்யா..
4. அன்புடன் அருணா அக்கா..
5. பதிவு பக்கமே தலை காட்டாமல் இருக்கும் தோழி தமிழினி..

18.10.2008

அவன் - சில தகவல்கள் [அ] சப்ப மேட்டரு...

2008-10-09T12:34:00.003+05:30

அவன் அவளை வெகுவாகவே நேசித்திருந்தான் போலும்..

அவனுக்கு கோவிலுக்கு போகும் பழக்கமிருந்தது.. வழமை போல் ஒரு கோவில் பிரகாரத்தில் அவளை முதன் முதலாய் சந்தித்தப்போது காதல் கடவுள் வீனஸை அவள் கண்களில் கண்டதாகவும், அவள் தேவதை என்றும் சொன்னான்.. அதுநாள் முதல் காதல் பித்து தலைக்கேறி விட்டதாகவும் இனி அவளில்லாமல் அவன் இல்லை என்றும் புலம்ப ஆரம்பித்தான்..

அவளிடம் பேசுவதற்கான வார்த்தைகளை நட்சத்திரங்களின் ஒளியிடமிருந்து தினம் இரவு திருடுவதாகவும், அவற்றை தன் வீட்டின் ஆறுபக்கமும் கண்ணாடியாலான ஒரு தனியறையில் அவ்வார்த்தைகளை சேமிப்பதாகவும், அவ்வார்த்தைகள் கண்ணாடிகளில் எதிரொலித்து எதிரொலித்து இன்னும் மெறுகேருவதாகவும் சொன்னான்..

சூரியன் மங்கி கிடந்த ஒரு மாலை வேளையில் வெகு எதேச்சையான சமயத்தில் அவள் பேசிய போது, கைவசமிருந்த ஒளி வார்த்தைகளை அவளிடம் உளறி கொட்டியதாகவும், அதில் மயங்கி அவனை காதலிக்க ஆரம்பித்ததாகவும் சொன்னான்.. பின் தினம் மாலையில் அவளை சந்திக்க ஆரம்பித்தாகவும் எடுத்து போன ஒளி பொருந்திய வார்த்தைகளை சொல்லி சொல்லி அவளை தன் பிடியில் கொண்டு வந்ததாகவும், அவ்வார்த்தைகளை பிரயோகிக்க ஆரம்பித்த பின், அவ்வார்த்தைகள் அவளை சூழ்ந்து கொண்டு அவளை வசீகரமானவளாக மாற்றின என்றும், அதன் பின் அவள் நிலவாக மாற ஆரம்பித்தாள் என்றும் கூறினான்..

அவன் தன்னை மிக நல்லவன் என்றும், கண்ணியமானவன் என்றும், அவளை தவிர வேறு எந்த பெண்ணையும் ஏறெடுத்தும் பார்ப்பதில்லை என்றும், ஒரு நாளும் அவளுக்கு வலுக்கட்டாயமாய் ஒரு முத்தம் கூட தந்ததில்லை என்றும், அவளோடு எங்கும் மேகங்களில் சுற்றியதுமில்லை என்றும், அவளை உண்மையாய் காதலிப்பதாகவும் சொன்னான்..

ஒருநாள் நடு இரவில் படப்படப்போடும் அதிர்ச்சி மற்றும் பயம் கலந்த முகத்தோடும் வந்திருந்த அவன், தன் வீட்டின் கண்ணாடி அறை உடைத்து நொறுக்கபட்டி இருப்பதாகவும், தான் சேமித்து வைத்திருந்த ஒளி வார்த்தைகள் களவு போய்விட்டதாகவும், தான் நட்சத்திரங்களிடமிருந்து திருடும் ஒளி வார்த்தைகளை பற்றி யாரோ நட்சத்திரங்களிடம் சொல்லிவிட்டதாகவும் சொன்னான்..

மேலும் அவன், அன்று மாலையில் அவளுக்காக காத்து இருந்தபோது அவள் வரவில்லை என்றும், அவளை தேடி அவள் வீட்டிற்க்கே சென்ற போது, வேறு ஒருவன் அவ்வார்த்தைகளை கொண்டு அவளை அழாகாக்கி கொண்டிருந்ததாகவும், அவள் "என்னை மறந்து விடு, உன்னை விட ஒளி வார்த்தைகள் தான் எனக்கு பிடித்தமானவை" என்று சொல்லிவிட்டு "நீ வாய்ப்புகளை பயன்படுத்தி கொள்ளவில்லை. உன் வாய்ப்புகளை நீ இழந்துவிட்டாய்" என்று சொல்லி ஏளனமாக ஒளி சிதற சிரித்தாள் என்றும் சொல்லி கதறி அழுதான்..

இனி காதல் தோல்வியில் தான் தாடி வளர்க்க போவதாகவும், அவளை நினைத்து கவிதை கிறுக்க போவதாகவும் சொன்னான்.. "நீ அவளிடம் அன்பை காட்டாமல்,உன் ஒளி வார்த்தைகளை மட்டுமே கொண்டு மயக்கி வைத்திருந்தாய்.அவளும் உன்னை விரும்பவில்லை.உன்னிடமிருந்த ஒளி வார்த்தைகளில் மயங்கி கிடந்தாள்.இது எப்படி காதலாகும்??
டேய்.. இது லவ்வு கெடியாது.. சப்ப லவ்வு.. சப்ப மேட்டரு.." என்று சொல்லியபோது அவன் கொஞ்சம் தெளிவாயிருந்தான்.. பின்னர் விடியும் வரை தண்ணியடித்தோம் சைடு டிஷ் ஏதுமில்லாமல்..

ஏனோ மறுநாள் மதியம் அவன் தற்கொலை செய்து கொண்டதாக தகவல் வந்தது "நானொரு கோழை" என்றொரு கடிதம் எழுதி வைத்துவிட்டு.. அவன் அவளை வெகுவாகவே நேசித்திருந்தான் போலும்..

டிஸ்கி: இதை எழுதி முடித்தபோது அய்யனாரின் "கங்காவைப் பற்றி சில தகவல்கள்" பதிவு ஞாபகம் வந்தது..

நான் மிகவும் நேசிக்கிறேன்...

2008-09-29T10:17:00.003+05:30

நம் சந்திப்புகளின் பொழுதுகளையெல்லாம்
கைகளுக்குள்
பொத்தி எடுத்துவந்து
என் அறையின் கனத்த மரப்பேழைக்குள்
பத்திரப்படுத்தி கொண்டிருந்தேன்
என்பதை நீயும் அறிவாய்..

நம் முதல் சந்திப்பு முதல்,
நீ காதல் சொன்ன பொழுது முதல்,
ஒரு அடர் மழைநாளில்
நீ முதன்முறையாக
என் கைகளை பிடித்துக்கொண்ட பொழுது முதல்,

பிறிதொரு ஆழ்ந்த பனி இரவின்
தனிமையில்
நான் உன்னை முதன்முறையாக
முத்தமிட்ட பொழுது முதல்,

என்னை மறந்து விடு என்று
நீ சொன்ன அந்த கடைசி சந்திப்பின்
பொழுதுவரை
மிக கவனமாய்
பத்திரப்படுத்தி கொண்டிருந்தேன்..

இன்றைய அடர் மழைநாளின்
இரவு குளிருக்கு
அப்பொழுதுகளை ஒவ்வொன்றாய்
தீயினுள் போட்டு குளிர்காய்ந்து கொண்டிருக்கிறேன்
கழிவிரக்கம் தாளாமல்..

தீயின் வெளிச்சத்தில்
மின்னுகிறது கையிலிருக்கும் மதுக்குவளை..

அம்மரப்பேழையினுள்
இன்னமும் ஒட்டிக்கொண்டு இருக்கிறது
உன் உண்மையான பிரியங்கள்.
அவற்றை நான் மிகவும் நேசிக்கிறேன்...

25.09.2008

திண்ணை... [தொடர்பதிவு]

2008-09-12T03:24:00.005+05:30

திண்ணையை பற்றி என்னை எழுத அழைத்த தங்கமயிலு திவ்யப்ரியாவுக்கு நன்றிகள் பல.. [இப்படித்தான் முன்னுரை எழுதனும்]

என்னை போய் திண்ணை பதிவை எழுத சொல்றாங்க.. என்ன கொடும சரவணன் இது!! இதை பத்தி எங்க வீட்டு திண்ணையை பார்த்து கொண்டே யோசித்ததில், திண்ணை, என்னை போடா வெண்ணை என்றது.. பின்ன.. சில சமயம் நண்பர்களோடு அமர்ந்திருக்கிறேன்.. திண்ணையில் உட்கார்ந்து ஷூ கழட்டியிருக்கிறேன்.. இதைத்தவிர எவ்வித சம்பந்தமும் கிடையாது திண்ணையோடு..

இதோடு இந்த திண்ணைக்கு பை பை சொல்லிட்டு, யாரையாவது ரெண்டு பேர புடிச்சி போட்டுட்டு பதிவை முடிச்சிடலாம்.. ஆனா நீங்க தப்பா நெனைப்பீங்க..

திண்ணை என்ற தொடர் பதிவை, பண்பாடு, கலாச்சாரம், அன்பு, விருந்தோம்பல் இவற்றை நினைவுகூறவே ஆரம்பித்திருக்ககூடும்.. ஆனால் என்னை மட்டும் விட்டு விடுங்கள்..

நான் உங்களுக்காக திண்ணையின் பரிணாம வளர்ச்சியில் வந்த இன்னொரு சிறப்பிடத்தை பற்றி எழுத போகிறேன்.. இப்போது திண்ணை இல்லாத வீடுகளையும் நீங்கள் பார்க்க கூடும்.. ஆனால் இந்த சிறப்பிடத்தை எங்கும் காணலாம்.. திண்ணையில் நண்பர்களோடு உட்கார்ந்து பேசமுடியா விஷயங்களை இந்த சிறப்பிடத்தில் நீங்கள் பேசலாம், விவாதிக்கலாம்..

[பில்டப் போதும்.]

அந்த சிறப்பிடத்தின் பெயர் *** குட்டி சுவர் ***

குட்டி சுவர் ஒரு சிறு குறிப்பு..

எப்போதும் ஒரு டீ கடைக்கு அல்லது பொட்டிகடைக்கு பின்னால் இருக்கும்.. பஸ் ஸ்டாண்டை ஒட்டி இருக்கும். தினம் தினம் நண்பர்களால் மாலை வேளைகளில் நிரம்பி இருக்கும்.. தலைமுறை தலைமுறையாய் வெவ்வேறு நண்பர் கூட்டங்களை சுமக்குமிடம்..

குட்டிசுவர் நண்பர்கள் ஒரு சிறு குறிப்பு..

பொதுவாக இந்த நண்பர்கள், ஒரே ஏரியா நண்பர்கள்.
வெவ்வேறு பள்ளிகளிலோ கல்லூரிகளிலோ படிப்பவர்கள்.
இந்த நண்பர்களில் ஒருத்தனுக்கு கூட ஒரு பெண் தோழியோ, GIRL FRIEND இருக்காது.. ஆனால் பெண்கள் மீது கொள்ளை ஏக்கமிருக்கும்.. ஆனால் "அட, பொன்னுங்ககிட்டலாம் எவன் பேசுவான். போய் பேசிக்கிட்டு.. வழிஞ்சிக்கிட்டு.. ச்ச..என்ன பொழைப்புடா இது என்று கெத்து பேச்சு பேசுபவர்கள்.. "
கையில காசே இல்லையென்றாலும் வாரயிறுதி நாட்களுக்கு குறைந்தபட்சம் ஒரு சினிமாவுக்கும் இன்ன பிற-களுக்கும் திட்டம் போடுபவர்கள்..
அடிக்கடி TREAT பற்றி பேசுபவர்கள்..

குட்டிசுவர் நிகழ்வுகள் ஒரு சிறு குறிப்பு..

பள்ளி காலங்களிலும் கல்லூரி காலங்களிலும் [இப்போது வாரயிறுதிகளின்] மாலை வேளைகளில் நண்பர்களோடு பேசி அளவளாவிய சிறப்பிடம்..

இங்கு பேசப்படாத விஷயங்களே கிடையாது.. எப்போதும் இந்த விஷயங்களில் முதலிடம் பிடிப்பது GIRLS மட்டுமே.. இரண்டாமிடம் சினிமா.. மூன்றாவது இடத்தை கிரிக்கெட் பிடிக்கும்.. அரசியல் பற்றி காரசாரமாக விவாதங்களும் உண்டு.

சின்னஞ்சிறு சண்டைகளுக்கும் குறைவில்லாத ஒரு இடம்.. ரெண்டு பசங்களுக்கு இடையே ஒரு பிரச்சனை என்றால், நிச்சயமாக ஒரு பெண் அவர்களுக்கிடையே இருக்கிறாள் என்று அர்த்தம்..

எத்தனையோ சிரிப்புகள், நக்கல்கள், காதல் தோல்வி, துரோகங்கள், வலிகள், ஏமாற்றங்கள், சுயநலம், என எல்லாவற்றையும் தினம் தினம் சந்திக்கிற இடம் குட்டிசுவர்.

இப்போது பள்ளி கல்லூரியில் படித்து கொண்டிருக்கும் குட்டிசுவர் ஜூனியர்களுக்கு ஒரு வார்த்தை.. இதை நீங்கள் அறிவுரையாய் கொண்டாலும் சரி..

குட்டிசுவரில் நீங்கள் கழிக்கும் பொழுதை குறைத்து கொள்ளுங்கள். அந்த நேரத்தை வேறு ஏதேனும் உருப்படியான ஒன்றை செய்ய முயலுங்கள். வீணாக்கப்பட்ட ஒரு நொடியை நீங்கள் எவ்வளவு கோடிகள் கொடுத்தாலும் வாங்கிடமுடியாது.. அனுபவத்தில் சொல்கிறேன்..

பின்குறிப்பு : இன்னும் பற்பல விஷயங்களை, குட்டிசுவர் பற்றியும், குட்டிசுவர் நண்பர்களை பற்றியும் வேண்டுமென்றே விட்டுவிட்டே எழுதி இருக்கிறேன் என்பதை நான் சொல்லாமலேயே இதை படிக்கும் குட்டிசுவர் நண்பர்களுக்கு புரிந்திருக்கக்கூடும்..

சரி.. சரி.. நிகழ்காலத்திற்கு வருவோம்..

யாரையாவது ரெண்டு பேர புடிச்சி போடணும் இந்த தொடர்பதிவிற்கு.. இந்த தடவையும் எனக்கு குழப்பமே கிடையாது..

முதல் நண்பர்.. பிரேம்குமார்..(காதல் எனப்படுவது யாதெனில் தொடர்பதிவிற்காக)

இரண்டாவதாக தோழி தமிழினி.. (மீ..மீ.. தொடர்பதிவிற்காக)

[அட.. நீங்களாச்சும் திண்ணையை பத்தி எழுதுங்கப்பா.. ]

கடைசி பின்குறிப்பு : இதுவரைக்கும் இந்த மாதிரி நான் எழுதினதே கிடையாது.. இவ்ளோ பெரிய பதிவு... இப்போதான் புரியுது இந்த தொடர்கதை எழுதுபவர்களின் உழைப்பு..

12.09.2008

காத‌ல் என‌ப்ப‌டுவ‌து யாதெனில்...

2008-09-07T21:48:00.012+05:30

காத‌ல் என‌ப்ப‌டுவ‌து யாதெனில் என்ற தொடர் பதிவிற்கு என்னை எழுத‌ அழைத்த‌ பிரேம்குமாருக்கு மிக்க ந‌ன்றி..!! (பிரேம் உங்களுக்கு ஒரு தொடர்பதிவு அழைப்பு சீக்கிரத்தில் என்னிடமிருந்து வரும்.. :))

காதல் எனப்படுவது யாதெனில்...
இன்றளவும்
எனக்கு கிடைக்கபெறாத ஒன்று.
நாளையே கூட நீ வரலாம்..

-0-

உன்னிடம்
செல்லமாய் சீண்டியும்
ஒரு முத்தத்திற்கு கெஞ்சியும்
விளையாட வேண்டிய நேரமிது..
பெட்டி தட்டி கொண்டும்
ஆணிகள் பிடுங்கி கொண்டுமிருக்கிறேன்..
எங்கிருக்கிறாய் நீ??

-0-

நீ
வரும் வரை
கவிதை எழுதியே
காலம் தள்ளவேண்டும் போலிருக்கிறது..
நீ வந்து விடு..
கவிதைகளை மூட்டை கட்டிவிட்டு
காதலிக்கலாம்..

-0-

படுக்கையில் வீழ்ந்ததும்
நீ வந்து விட்டதாயும்
என் காதலை ஏற்று கொண்டதாயும்
கற்பனை செய்து கொண்டே
தூங்க ஆரம்பிப்பேன்..
கனவில் நீ வந்து காதலிக்க ஆரம்பிப்பாய்..

-0-

நாமிருவரும்
சேர்ந்து நனைவதற்காகவே
இன்னும் சில
அழகான மழைகள்
மேகங்களுக்குள்ளேயே காத்திருக்கின்றன.
சீக்கிரம் வா..

-0-

ஆனால் எதிர்ப்பார்ப்புகளேதுமின்றி வா..
உனக்கென்று கொடுக்க
என்னிடம் இருப்பதெல்லாம்
அளவற்ற நேசமும்
குறைவற்ற முத்தங்களும் மட்டுமே..

-0-

பின் குறிப்பு : என்னை பொறுத்தவரை காதல் எனப்படுவது யாதெனில், என் தேவதையே.. என் தேவதையை எதிர்பார்த்து கொண்டிருக்கிறேன் என்பதை இப்படியெல்லாம் தெளிவுபடுத்த வேண்டியிருக்கிறது.. (எப்படியோ தலைப்பையும் சம்பந்தபடுத்தியாட்சி..)

யாரையாவது இந்த தொடர் பதிவுல புடிச்சி போடனுமேன்னு நெனச்ச நேரத்தில, நானே தூண்டில்ல மாட்டிகிறேன்னு வந்து, என் குழப்பத்தை நீக்கிய தங்கமயிலு திவ்யப்ரியாவை இந்த தொடர்பதிவுக்கு அழைக்கிறேன்.. (திண்ணை தொடர்பதிவிற்கு என்னை அழைத்ததற்கான ஒரு சின்ன பழிக்கு பழி.. ;))

விதிமுறைகள்:
1. பதிவின் தலைப்பு - “காதல் எனப்படுவது யாதெனில்…” (மாற்றக்கூடாது).
2. என்ன பதிவிடலாம் - இது தான் எழுதணும் என்கிற கட்டாயம் கிடையாது. பதிவு எதைப்பற்றி வேண்டுமானால் இருக்கலாம். கதை, கவிதை, நக்கல், கட்டுரை, மொக்கை………. என்ன வேணும்னா எழுதுங்க உங்கள் விருப்பம். (ஆனால் தலைப்போட கொஞ்சமாவது சம்பந்தம் இருக்கணும்)
3. பதிவு போட இன்னும் ஒருவரை அழைக்கணும். முன்பெல்லாம் இரண்டு மூன்று பேர் அழைக்கப்பட்டதால் தொடர் சங்கிலிகள் எங்காவது ஒரு தொடர்பு அறுந்தாலும் அவை கொஞ்சம் பயணித்தன. இங்கு ஒருவர் தான் அழைக்கப்படுகிறார் அதனால் நீங்கள் அழைப்பவரின் வசதியைக் கேட்டுவிட்டு கூப்பிடுங்கள்.
4. மறக்காமல் விதிமுறைகளை இடவும். விதிமுறைகள் மாற்றக் கூடாது.

07.09.2008

செத்தொழிந்தது...

2008-08-25T00:38:00.003+05:30

அசாத்தியங்களை மீறி
உன்னிடம்
என் காதலை உரைத்திட முடியுமென்ற
கொஞ்ச நஞ்ச சாத்தியங்களும்
செத்தொழிந்தது..

நீயே
நான் ஒருவனை காதலிக்கிறேன்
என
என்னிடமே சொல்லிவிட்ட பிறகு..

இனி
என் காதலுக்கு
சொல்லப்படாத காதல்,
ஒருதலை காதல்,
என்ற பட்டங்களும்

எனக்கு
துன்புறுத்தி வேடிக்கை பார்க்க
உன் நினைவுகளும்,
கவிதைகளென்ற பெயரில்
கிறுக்குவதற்கு தாள்களும்,
வாய்த்துவிடும்..

இயலாமைகளால்
ஒடிந்த காதல்களின் கணக்கில்
ஒன்று கூடும்.

நான்
உன்னிடம்
காதல் கடிதம் தந்ததில்லைதான்..
வார்த்தைகளுக்குள் கூடுகட்டி
என் காதலை சொன்னதில்லைதான்..
கொட்டுகின்ற மழையில்
உன் கைகளை பிடித்து
என் காதலை உணர்த்தியதில்லைதான்..

எது எப்படியோ,
என் காதல்
உனக்கு தெரியவே தெரியாது
என்று மட்டும் என்றும் சொல்லிடாதே..
அதை
உன் மனசாட்சி கூட நம்பாது...

07.08.2008

சூடான தேநீரும் உன் முத்தமும்...

2008-08-13T11:23:00.005+05:30

கடந்த மழைக்காலத்தில்
அறிமுகமே இல்லாத நாம்
அறிமுகப்படுத்திகொள்கிறோம்
இன்றைய
இந்த மழையை
உனக்கு நானும் எனக்கு நீயும்..

-0-

கடந்த மழைக்காலத்தில்
நினைத்தாயா??
உன் அடுத்த மழைக்காலங்கள்
என்னோடு கழியுமென்று..

-0-

கடந்த மழைக்காலம்
மிக மிக அழகாய்
என்னோடு பயணப்பட்ட போதே
சின்னதாய் ஒரு எண்ணம்
வந்திருந்தது..
இந்த மழைக்காலம்
இன்னும் மிக்க அழகாய்
இருக்குமென்று..
இப்போது நீ என்னோடு இருக்கிறாய்..

-0-

கடந்த மழைக்காலம்
முடியும் வரை
நான் தேவதையை
பார்த்திருக்கவில்லை..
இந்த மழைக்காலத்தில்
தேவதையோடு
வாழ்ந்துகொண்டிருக்கிறேன்..

-0-

கடந்த மழைக்காலத்தில்
சில கவிதைகள் எழுதினேன்..
இந்த மழைக்காலத்தில்
சில கவிதைகள் தொகுப்புகள் படிக்க
விருப்பமாயிருக்கிறேன்
உன்னோடு சேர்ந்து..

-0-

"கடந்த மழைக்காலம் முழுதும்
அலுவலகம் சென்றேன்..
ஆனால்
இந்த மழைக்காலம் முழுமைக்கும்
விடுப்பு எடுக்கலாமா என்று
யோசித்துகொண்டிருக்கிறேன்.."
என்று சொன்னதற்கா இப்படி
முறைக்கிறாய்?

-0-

கடந்த மழைக்கால குளிரிரவில்
போர்த்தி கொள்ள
ஒரு போர்வை மட்டுமே இருந்தது..
இந்த மழைக்காலத்தில்
நீ மட்டுமே இருக்கிறாய்..

-0-

கடந்த மழைக்காலத்தில்
சூடான தேநீர் மட்டும்
போதுமாயிருந்தது..
இந்த மழைக்காலத்தில்
சூடான தேநீரோடு உன் முத்தத்தையும்
எதிர்பார்க்கிறது மனசு..

10.08.2008

A for apple.com

2008-07-31T20:31:00.018+05:30

மீண்டும் கவிதையல்லாத மற்றுமொரு பதிவு..

தான் பெற்ற இன்பத்தை நானும் பெறவேண்டும் (பழிக்கு பழி அல்ல) என்று விரும்பிய SRI-க்காக.. இந்த பதிவு.. நான் அவ்வப்போது செல்லும் வலைத்தளங்களின் பட்டியலை சொல்ல சொல்லியிருக்கிறார்..

A - ஆக்சிஸ் பேங்க்
B - பிளாக்கர்
C - தொடர்புக்கு
E - ஈபுக்ஸ்
F - பிளிக்கர்
G - கூகிள்
I - நான் கூகிள்
J - ஜாவா கேள்விகளுக்கு
K - SRIயின் கரையோர கனவுகள் :) :)
M - மஸ்ட் டவுன்லோட்
N - நேஷனல் ஜியோகிராபிக்
O - ஓர்குட்
P - ப்ரோக்ரமர் உலகம்
Q - பொன்மொழிகள்
R - ராகா
S - சாப்ட்பீடியா
T - தமிழ்மணம்
U - சும்மா Unrestricted ஸர்ப் பண்ண
W- வோர்ட்பிரஸ்
Y - யாஹூ
Z - மொபைலுக்காக

என் கூகிள் புக்மார்க்ஸ்-ல் ஏகப்பட்ட வலைதள முகவரிகள் உண்டு.. ஆனால் மேற்கூறிய வலைத்தளங்கள் என் மனதில் இருக்கும் அல்லது சட்டென்று நினைவுக்கு வந்தவைகளை மட்டுமே இங்கு குறிப்பிட்டுள்ளேன்.. :)

நான் இணைய பைத்தியம்.. நான் இணையத்தில் சுற்றுவதே என் வேலை.. தினமும் எதையாவது தேடி கூகிள் சர்ச்சில் ஆரம்பிக்கும் என் இணைய உலகம்.. மிக மிக மிக பெரியது.. :)

ஓகே.. இப்போது நான் செய்யவேண்டியது என்னவென்றால்.. ... .... :) :)

நான் குறிப்பிடும் மூன்று ந(ண்)பர்கள்..

இனிமையான தமிழினி
அன்புடன் அருணா
என் எதற்கு எப்படி மது

Rule:
1. The Tag name is A for Apple
2. Give preference for regular sites
3. Ignore your own blogs, sites.
4. Tag 3 People.

நன்றி.. நன்றி.. நன்றி.. :) :) :)

பின் குறிப்பு 1 : கவிதையை தவிர வேறு எதையும் பதிவிடும் எண்ணமே கிடையாதெனக்கு.. என்னை இன்னொருமுறை இந்த மாதிரி பதிவு எழுத செய்த இந்த வலையுலக புது தோழி SRIக்கு, எதாவது செய்யனுமே.. என்ன செய்யலாம் என்பதினை பின்னூட்டத்தில் யாரேனும் இந்த முறையும் எழுதுக...

Blogging Friends Forever Award

2008-07-30T23:50:00.012+05:30

இந்த தமிழ் வலையுலகத்திற்கு நான் புதியவன்..
ஆனால் திடீரென்று இன்ப அதிர்ச்சி என்ற பெயரில் தமிழினி "Blogging Friends Forever Award".... என்ற ஒன்றை கொடுத்திருக்கிறார்கள்..

மிக்க நன்றி தமிழினி...
(நான் சோகமான கவிதைகள் எழுதுகிறேன் என்பதில் பெரிய வருத்தமுள்ள ஒரு அன்பு உள்ளம் உடையவர் தமிழினி)

அடுத்து இன்னொரு பொறுப்பையும் என்னிடம் கொடுத்துருக்காங்க,விதிமுறைகளோட...
அந்த விதிமுறைகள் என்னென்ன...அப்படின்னா.. (copy paste பண்ணியாச்சி)

1)நான் இந்த அவார்டை 5 பேருக்கு கொடுக்கணும்..
(சத்தியமா இந்த விளையாட்ட நான் தொடங்கல..)

2)இந்த 5 பேருல 4 பேரு நம்ம ப்ளாகை தொடர்ந்து படிக்கிறவங்களா இருக்கணும்.. ஒருத்தர் நம்ம ப்ளாகை புதுசா படிக்க தொடங்கினவங்களா இருக்கணும்..
(என் தளத்திற்கு எல்லாருமே புதுசுதான்.. ;))

3)இந்த அவார்ட் உங்களுக்கு யாரு கொடுத்தாங்களோ அவங்களுக்கு மறுபடியும் ஒரு link தரனும்..
(அது கொடுத்திரலாம்..)

இவங்க தான் அந்த ஐந்து நண்பர்கள்.. இவர்களை நண்பர்கள் என்பதில் எனக்கு மிக்க சந்தோஷமே..

மொழியோடு பயணம் செய்து கொண்டிருக்கும் பிரேம்குமார்

அழகான கரையோரத்தில் கனவு கண்டு கொண்டிருக்கும் ஸ்ரீ

மழை நேசிக்கும் அன்புடன் அருணா

பிம்பங்களுடன் பேசிக்கொண்டிருக்கும் மேகா

ஏன் எதற்கு எப்படி என்று கேட்கும், என்ன எழுத என்று எழுதும், புதியவர் மது

பின் குறிப்பு 1 : எல்லாவற்றிக்கும் தமிழினி தான் காரணம்.. (3rd Rule Over)

பின் குறிப்பு 2 : கவிதையை தவிர வேறு எதையும் பதிவிடும் எண்ணமே கிடையாதெனக்கு.. என்னை இந்த பதிவு எழுத செய்த இந்த வலையுலக புது தோழி தமிழினிக்கு, எதாவது செய்யனுமே.. என்ன செய்யலாம் என்பதினை பின்னூட்டத்தில் யாரேனும் எழுதுக... ;)

ரத்த வாடை...

2008-07-22T02:06:00.006+05:30

நமக்கிடையில்
பெருகி வழிந்த மௌனத்தை தவிர்க்க

வலுக்கட்டாயமாய்
ஒரு சிறு புன்னகை செய்து கொண்டோம்..

நல்லவேளை
சுற்றியிருந்த எவரும்
கவனிக்கவில்லையென்பதில்
சற்றே நிம்மதியடைந்தோம்..

பின்னொரு
மழையற்ற வெறுமை நாளில்
தத்தம் மௌனங்களை
இறுக நெஞ்சோடு அணைத்தபடி
ஒருவரையொருவர் கவனிக்காததை போல்
வெற்றிகரமாய் கடந்து சென்றோம்..

கிழிபட்ட இதயமொன்றின்
ரத்த வாடை
அவ்விடத்தில் வீசியதாய்
யாரோ என்னருகில் பேசிகொண்டிருந்தனர்...

22.07.2008

எவ்வித தொடர்புமில்லை...

2008-06-28T03:01:00.012+05:30

கவனிப்பாரற்று
பெய்து கொண்டிருந்தது
மழை..

ஒரு குடையோடு
தூரத்தில் சென்று கொண்டிருந்தாய்
நீ..

எச்சலனமுமின்றி
உன்னையே வெறித்துக்கொண்டிருந்தேன்
நான்..

பேருந்து நிழற்குடையின் கீழ்
படுத்துக்கொண்டிருந்தது
ஒரு நாய்..

எவ்வித தொடர்புமில்லை
நம் நால்வருக்கும்..

கடைசியாய் பெய்த
பெருமழையன்று
இதே பேருந்து நிழற்குடையின் கீழ்
ஒருவர் கையை ஒருவர் பிடித்தபடி
இதே நாய்க்கு
பிஸ்கட் போட்டுக்கொண்டே
மழையை ரசித்ததை

நிச்சயம் நீ மறந்திருப்பாய்..
நானும்
இனி மறக்க முயற்சிப்பேன்...

28.06.2008

நம்புவாயா?

2008-04-08T23:57:00.003+05:30

அர்த்தமில்லாமல்
அகால வேளையில் பொழிவதாய்
அலுத்து கொள்கிறாய்
இந்த மழையை..

உன்னிடம்
காதலை சொல்ல முடியாமல்
வார்த்தைகளை
மென்று விழுங்கிகொண்டிருக்கும்
எனக்கு

இந்த மழை
வார்த்தைகளை கோர்த்து தருகிறது
என்று சொன்னால்
நீ நம்புவாயா?

07.04.2008

வார்த்தை குவியல்கள்...

2008-02-20T00:40:00.005+05:30

மனதின் எல்லையை
தாண்டிய பிறகு..
எல்லா கவிதைகளும்
வெறும்
வார்த்தை குவியல்கள் தான்...

ஆனாலும்
எனக்கு
மொழியை தவிர
வேறு வழியேதுமில்லை
என்னை சொல்ல...

11.01.2006

மாறிக்கொண்டிருக்கிறேன்...

2008-01-28T16:19:00.005+05:30

நீ
வேண்டாமென்று
வீசி எறிந்துவிட்ட
என் மனதை

மீண்டும்
நான்
என்னிடத்தில்
எடுத்துக் கொள்ள
எனக்கு விருப்பமில்லை...

அது
அனாதையாய்
அலைந்து திரிந்து கொண்டிருக்கிறது...

நானோ
மனச்சாட்சி இல்லாத
மனிதனாய்
மாறிக்கொண்டிருக்கிறேன்...

28.01.2008

நீ தூங்கும் அழகு...

2008-01-14T11:09:00.003+05:30

ஒரு
அழகான கனவு
தூங்கிகொண்டிருப்பதைப் போலிருக்கிறது..

நீ
தூங்கும் அழகு...

03.01.2008

நீ.. நான்...

2008-01-14T10:57:00.003+05:30

தூறலாய்
நீ..

குடை பிடிக்காமல்
நான்...

11.11.2005

ஆயத்தமாகிக் கொண்டிருக்கிறது...

2008-01-14T10:56:00.004+05:30

இவ்வளவு அழகான நீ
என் பார்வை புலத்தில்
இருக்கிறாய்..

உனை கண்டதில்,
இதயம்
துடிப்பதை நிறுத்தி விட்டு
வெடிப்பதற்கு
ஆயத்தமாகிக் கொண்டிருக்கிறது...

08.10.2007

நீ மட்டும்...

2008-01-14T10:44:00.006+05:30

மனிதர்கள்
பிறந்து கொண்டிருக்கும்
பூமியில்,

நீ
மட்டும்
தேவதையாய் பிறந்திருந்தாய்..

25.09.2007